A Cámara da Coruña lanza novas axudas para impulsar a ciberseguridade nas pemes

A Cámara da Coruña abrirá o 19 de agosto o prazo de presentación de solicitudes para o Programa Peme Cibersegura, unha iniciativa destinada a reforzar a seguridade dixital das pequenas e medianas empresas da súa demarcación territorial.
Estas axudas, co-financiadas polo Fondo Europeo de Desenvolvemento Rexional (FEDER) dentro do Programa Plurirrexional de España FEDER 2021-2027 (POPE), permitirán ás empresas “aplicar plans específicos de ciberseguridade para protexer os seus sistemas, datos e operacións fronte a ameazas dixitais”, en palabras da entidade cameral.
O programa contempla unha axuda máxima próxima aos 2.600 euros por empresa, sobre un orzamento máximo elixible de 4.280 euros. Esta contía será co-financiada ao 60% por FEDER.
A convocatoria forma parte dun programa máis amplo que inclúe, ademais, servizos gratuítos de diagnóstico e seguimento para cada peme participante.
Poderán acollerse a estas axudas as pemes dadas de alta no Censo do IAE e pertencentes á demarcación da Cámara da Coruña. O prazo de presentación de solicitudes ficará aberto ata o 14.00 h do 15 de outubro de 2025, ou ata esgotarse o orzamento dispoñible.
A Cámara destaca a importancia destas axudas no contexto actual, “no que as pemes están cada vez máis expostas a riscos dixitais”, sinala a entidade, engadindo que “este programa ofrécelles non só financiamento, senón tamén asesoramento técnico”.