A Comisión Europea analiza se Gemini cumpre a DMA

Teresa Ribera, vicepresidenta executiva para unha Transición Limpa, Xusta e Competitiva, asegura que «a través dos procedementos iniciados hoxe queremos axudar a Google explicando con máis detalle como debe cumprir as súas obrigas de interoperabilidade e de intercambio de datos de busca en liña».

A Comisión Europea puxo en marcha dous procedementos de especificación co obxectivo de axudar a Google a cumprir determinadas obrigas establecidas na Lei de Mercados Dixitais (DMA). Estas actuacións formalizan o diálogo regulador entre o Executivo comunitario e a compañía estadounidense en relación con aspectos concretos da súa adaptación ás esixencias da norma.
O primeiro dos procedementos céntrase na obriga recollida no artigo 6(7) da DMA, que esixe aos gardiáns de acceso garantir unha interoperabilidade efectiva e gratuíta para desenvolvedores terceiros coas funcións de hardware e software controladas polo seu sistema operativo. Neste caso, a Comisión pon o foco nas funcionalidades empregadas polos servizos de intelixencia artificial propios de Google, como Gemini. A intención é definir de que maneira Google debe ofrecer aos provedores externos de servizos de IA un acceso igualmente efectivo ás mesmas capacidades das que dispoñen os seus propios produtos, co fin de asegurar condicións equitativas de innovación e competencia no ecosistema de dispositivos móbiles intelixentes.
O segundo procedemento aborda a obriga establecida no artigo 6(11) da DMA, pola que Google debe facilitar aos provedores terceiros de motores de busca en liña o acceso a datos anonimizados de clasificación, consultas, clics e visualizacións procedentes do seu buscador, en condicións xustas, razoables e non discriminatorias. A análise da Comisión abrangue cuestións como o alcance dos datos que deben compartirse, os métodos de anonimización, as condicións de acceso e a posible inclusión dos provedores de chatbots baseados en intelixencia artificial como beneficiarios deste dereito. Un acceso efectivo a conxuntos de datos útiles permitiría aos competidores optimizar os seus servizos e ofrecer alternativas reais aos usuarios.
Segundo avanzou a Comisión, os procedementos deberán concluír nun prazo máximo de seis meses desde a súa apertura. Nos vindeiros tres meses, o Executivo comunitario comunicará a Google as súas conclusións preliminares, nas que se detallarán as medidas que considera necesarias para garantir o cumprimento efectivo da DMA. Estes documentos, nunha versión non confidencial, faranse públicos para recoller observacións de terceiros.
A Lei de Mercados Dixitais ten como finalidade garantir mercados dixitais xustos e disputables, regulando o comportamento das grandes plataformas que actúan como intermediarios clave entre empresas e consumidores. No caso de Google, a Comisión designou en setembro de 2023 varios dos seus servizos principais como plataformas suxeitas á DMA, obrigándoa a cumprir plenamente coas disposicións da norma desde marzo de 2024.