A Comisión Europea inicia o procedemento para esixir a Apple unha maior interoperabilidade

A Comisión Europea advertiu en marzo da investigación sobre as infraccións de Apple da DMA

A Comisión Europea anunciou no mes de marzo que estaba a investigar incumprimentos por parte de Apple e outras compañías da Lei de Mercados Dixitais (DMA), e agora confirman o inicio de dous procedementos de especificación para axudar a Apple a cumprir coas súas obrigas de interoperabilidade baixo a Lei de Mercados Dixitais, que esixe a Apple proporcionar unha interoperabilidade libre e efectiva a desenvolvedores e empresas de terceiros cos compoñentes de hardware e software controlados polos sistemas operativos de Apple, iOS e iPadOS, designados baixo a DMA.
Os procedementos de especificación formalizan o diálogo regulador da Comisión con Apple en certas áreas específicas do cumprimento por parte de Apple da DMA. No marco da Lei a Comisión pode, por iniciativa propia, adoptar unha decisión que especifique as medidas que un gardián de acceso debe implementar para garantir o cumprimento efectivo das obrigas substanciais da DMA, como a obriga de interoperabilidade.
O primeiro procedemento céntrase en varias funcionalidades e características de conectividade de iOS, predominantemente usadas para e por dispositivos conectados. Os dispositivos conectados son un grupo variado, amplo e comercialmente importante de produtos, que inclúe reloxos intelixentes, auriculares e cascos de realidade virtual. As empresas que ofrecen estes produtos dependen dunha interoperabilidade efectiva cos teléfonos intelixentes e cos seus sistemas operativos, como iOS. A Comisión pretende especificar como Apple proporcionará unha interoperabilidade efectiva con funcionalidades como as notificacións, o emparellamento de dispositivos e a conectividade.
O segundo procedemento céntrase no proceso que Apple puxo en marcha para abordar as solicitudes de interoperabilidade presentadas por desenvolvedores e terceiros para iOS e iPadOS. É crucial que o proceso de solicitudes sexa transparente, oportuno e xusto para que todos os desenvolvedores teñan un camiño efectivo e previsible cara á interoperabilidade e poidan innovar.
A Comisión concluirá os procedementos dentro de 6 meses dende a súa apertura. No transcurso destes procedementos, a Comisión comunicará as súas conclusións preliminares a Apple, onde explicará as medidas que o gardián de acceso debería tomar para cumprir de forma efectiva coa obriga de interoperabilidade da DMA. Publicarase un resumo non confidencial das conclusións preliminares e das medidas previstas para que terceiros poidan proporcionar os seus comentarios.
Estes procedementos lévanse a cabo sen prexuízo das facultades da Comisión para adoptar unha decisión que estableza o incumprimento de calquera das obrigas previstas na DMA por parte dun gardián de acceso, incluíndo a posibilidade de impoñer multas ou pagamentos periódicos de sancións.