A Coruña achega formación tecnolóxica para o desenvolvemento online de pequenos negocios

luns, 27 de maio do 2024 S. P.

O Concello da Coruña porá en marcha, a partir do día 6 de xuño, un programa de apoio ás pequenas empresas da cidade, proporcionándolles oportunidades de formación para comezar a desenvolverse ou mellorar o seu posicionamento no entorno online.
Máis polo miúdo, trátase dunha iniciativa destinada a persoas autónomas, emprendedoras e pequenas empresas, co obxectivo de que “aprendan a mellorar o seu negocio no entorno online e acaden competencias nas áreas do deseño web, as redes sociais desde o punto de vista empresarial, a visibilidade nas redes, o deseño de marca e branding, a publicidade nas canles dixitais, a creación de contidos e a estratexia de negocio”.
O programa de formación está composto por oito obradoiros que se impartirán de maneira presencial no Centro de Empresas ACCEDE Papagaio e constarán dunha parte de formación teórica, de dúas horas de duración, e dun acompañamento individual, de catro horas.
Pódese obter máis información e realizar a inscrición na web medra.gal.
Os obradoiros e as súas datas de realización son os seguintes:
-Como crear unha páxina web profesional desde cero (6 de xuño, de 19.00 a 21.00 horas).
-Como utilizar as redes sociais para a túa empresa e comezar a vender (13 de xuño, de 19.00 a 21.00 horas).
-Como mellorar a visibilidade online dunha páxina web e por que a maioría delas son invisibles (26 de setembro).
-Como crear a túa primeira campaña publicitaria online (3 de outubro).
-Como aproveitar o posicionamento SEO Local para atopar máis clientes na túa cidade (17 de outubro).
-Como crear unha imaxe de empresa efectiva: deseño e branding (24 de outubro).
-Crea un novo produto e insíreo no mercado" (7 de novembro).
-Como utilizar as ferramentas de Intelixencia Artificial máis coñecidas para mellorar o teu negocio (14 de novembro).

PUBLICIDADE