A Deputación de Pontevedra remata o mes de xuño con catro novos obradoiros TIC

A rede SmartPEME da Deputación de Pontevedra vai rematar xuño con máis formación tecnolóxica para pequenas e medianas empresas, persoas autónomas e profesionais. Serán catro cursos impartidos novamente de xeito online, un formato que substituíu durante a pandemia as accións presenciais que se viñan achegando nos distintos puntos que a rede ten espallados pola provincia. As actividades versan sobre como debuxar con Onshape Aseembly II e III, como realizar animacións con GIFs con fotografías de produto e como dar os primeiros pasos con Google Analytics 4.
En concreto, este martes 29 impartirase o obradoiro Debuxo con Onshape, Asembly II, a cargo de Manuel Freire, experto universitario en Robótica e Impresión 3D, quen falará da practicidade da ferramenta e ensinará a utilización do software para debuxos.
O mércores 30, Lara Taboada, falará de Vídeo Márketing II - Animacións e GIFs con fotografías de produto, obradoiro que permitirá descubrir a potencialidade das fotografías a través da animación das mesmas, xerando un contido dinámico e interesante.
Xa pola tarde, Esther Garcinuño, Diplomada en Ciencias Empresariais, impartirá Primeiros pasos con Google Analytics 4, onde falará da evolución que Google experimentou na análise de datos con respecto a anterior versión, e de como recompila a información dos usuarios que acceden a nosa web.
Para finalizar a semana, o xoves 1 de xullo, será a quenda de Debuxo con Onshape, Aseembly III a cargo Manuel Freire, experto universitario en Robótica e Impresión 3D, quen ensinará a forma de debuxar a través do software.