A Escola Superior de Enxeñaría Informática acolle un campamento tecnolóxico para rapazas

A Escola Superior de Enxeñaría Informática do Campus de Ourense vén de anunciar que celebrará un campamento tecnolóxico destinado a promover a vocación tecnolóxica entre as rapazas e contribuír así a rachar a fenda de xénero que existe á hora de elixir carreiras TIC.
No caso da UVigo, o campamento, gratuíto, desenvolverase os días 28, 29 e 30 de xuño de 9:30 a 14:30 horas nas instalación da Escola Superior de Enxeñaría Informática. A actividade está destinada a alumnos de primeiro, segundo e terceiro da ESO e de primeiro e segundo Bacharelato e Formación Profesional.
A iniciativa incluirá obradoiros de carácter divulgativo e de iniciación á Intelixencia Artificial, a programación móbil, a robótica e o pensamento computacional. Ademais, terán lugar charlas sobre a profesión de Enxeñaría Informática e algunha visita relacionada, como a centros tecnolóxicos. O campamento forma parte do proxecto Mática. “Trátase dun proxecto destinado a fomentar as vocacións femininas en carreiras TIC. Este campamento tecnolóxico, que se celebrará nos tres campus galegos onde se imparte a titulación de Enxeñaría Informática, é a súa primeira actividade”, comenta o director da Escola Superior de Enxeñaría Informática, Francisco Javier Rodríguez.
A participación nesta acción, e noutras similares que se levan a cabo no centro ourensán, explica o seu responsable, xorde ante “a problemática da falta de alumnas nas carreiras TIC, non é algo estrutural, senón que o decrecemento estase producindo nos últimos anos”.