A LaconNetwork celebra o seu cuarto aniversario en Vigo
venres, 31 de xaneiro do 2014
Centos de emprendedores e profesionais do sector tecnolóxico
galego xuntáronse hoxe no Auditorio Mar de Vigo para participar no evento de
celebración do 4º aniversario
da LaconNetwork, de xeito que, aparte do tradicional xantar para fomentar o
networking entre os participantes,
tiveron lugar un par de mesas redondas e un relatorio, que xunto co acto de
entrega dos X Premios EGANET conformaron unha completa xornada que podemos ver
como un signo do dinamismo que conserva este ámbito profesional na nosa
comunidade.
A primeira actividade da mañá foi unha mesa redonda moderada polo director para
Galicia de Onda Cero, Ignacio Capeáns, no que Iñaki García Vallejo (IGV-Área de
Gestión), Eduardo García Erquiaga (Escola de Negocios Novacaixagalicia) e
Norberto Penedo Rey (IGAPE) discutiron sobre a difícil situación actual do
sector do emprendemento, que medrou moito nos últimos anos por mor da
conxuntura económica.
Máis ilustrativa podía resultar a seguinte mesa redonda, conducida por Carlos Tresandí (CRTVG), na que
puideron coñecerse tres proxectos empresariais galegos que están a vender/desenvolver
produtos físicos.
Así, Alberto Torrón comentou a súa experiencia coa tenda de
comercio electrónico Todotaladros.com (que foi un excelente exemplo das
barreiras que hai que superar para poder ter un bo negocio na Rede sen as
limitacións do comercio tradicional); Javier Bordejé dei a coñecer o negocio de
Primux Tech, que consegue operar no complexo e dinámico mercado dos smartphones
e tablets dende Ourense con produtos fabricados en China pero deseñados dende
Galicia; e José Manuel Ruiz deu conta do seu novo emprendemento, Smarttek, que en poucas semanas
vai estrearse comercialmente con solucións tecnolóxicas baseadas en
robótica e outros tipos de sistemas automáticos emerxentes que demostran que é
posible innovar e crear novas iniciativas dende a nosa terra.
- David Perdomo encargouse de conducir o evento
Para animar e conducir estas actividades contouse coa presenza do humorista
coruñés David Perdomo, que
soubo conectar coa audiencia cos seus improvisados comentarios. Tamén pasaron
polo escenario Frankie Gómez, un dos organizadores e fundadores da
LaconNetwork, e figura visible do evento, para facer un breve balance desta
serie de encontros mensuais; e o blogueiro e formador Enrique Dans, quen
compartiu coa audiencia as súas reflexións sobre a comunicación dixital e a
imaxe persoal.
O profesor Dans falou da necesidade que temos na actualidade de vixiar a
presenza na Internet tanto das empresas como dos profesionais, polo que a
monitorización da nosa imaxe na Rede xa non sería un acto de vaidade, senón que
na actualidade xa é unha necesidade, para poder saber o que se di de un, e
poder así participar na conversa en liña cando é preciso. Coidar a imaxe
persoal de cadaquén na Internet é importante non só para cada particular, senón
que este valor de imaxe tamén se transmite ás empresas nas que se traballa,
polo que cada vez ten máis peso o noso reflexo na web e nas plataformas
sociais, polo que hoxe xa non podemos vernos como entes illados, senón que
temos que proxectarnos a través das TIC para poder sermos competitivos.
Para rematar o encontro, celebrouse o habitual xantar, no que os participantes
puideron conversar durante varias horas con outros profesionais do sector
tecnolóxico, o que en numerosas ocasións ten demostrado ser moi produtivo, pois
non son poucas as alianzas e relacións xurdidas entre profesionais e proxectos
tecnolóxicos galegos grazas a este tipo de contactos, deixando claro que hai
que dar a coñecer o que se fai para poder beneficiarse de achegas que poidan
chegar do resto do sector a través das sinerxías que poden xurdir grazas á
comunicación entre os moitos proxectos que non cesan de emerxer en Galicia.
- O relatorio de Enrique Dans completouse con reflexións sobre distintos temas da actualidade TIC grazas ás preguntas introducidas polos asistentes