A Mesa pide que a aplicación Radar COVID estea dispoñible en galego

luns, 10 de agosto do 2020 Marcus Fernández

Hai unha semana demos conta da posibilidade de instalar nos nosos dispositivos móbiles a aplicación de rastrexo de contactos Radar COVID, que será a empregada oficialmente no territorio español para tirar proveito da solución artellada por Google e Apple para axudar a mitigar a pandemia facilitando información sobre a nosa exposición á COVID-19 valéndonos da información recollida a través de Bluetooth para saber así se estivemos en contacto con persoas que indicasen dar positivo nunha proba de coronavirus.
Dende o Estado confían en poder aplicar esta ferramenta de xeito xeral en todo o territorio español a partir do 15 de setembro, pero mentres abren a posibilidade a que as comunidades autónomas vaian incorporándose a este programa de rastrexo de contactos que entraría en funcionamento hoxe mesmo e, aínda que descoñécese o que acontecerá no caso galego, dende A Mesa pola Normalización Lingüística denuncian que a aplicación publicada está dispoñible só en español e inglés, ignorando as linguas co-oficiais do Estado.
O presidente da Mesa, Marcos Maceira, asegura que «temos dereito a recibirmos información, atención e axuda sobre a COVID-19 en galego». A Mesa, a través da Liña do Galego, instan ás institucións sanitarias a mudar esta situación e comunicar información sobre a COVID-19 na nosa lingua.

PUBLICIDADE