A RAGC e GAIN distinguen á xornalista Mila Méndez polo seu traballo sobre a revolución informática galega
venres, 9 de xuño do 2023
A oitava
edición do Premio de Xornalismo Científico Celia Brañas 2023
xa ten gañadores. O certame, organizado pola Real Academia Galega de
Ciencias (RAGC) co apoio da Xunta de Galicia a través da Axencia
Galega de Innovación (GAIN), ten como obxectivo galardoar unha peza
xornalística científica ou tecnolóxica, de carácter informativo,
en formato escrito ou audiovisual, publicada ou emitida no último
ano en calquera medio galego (ou edición galega dun medio estatal).
Os premiados desta edición foron a xornalista Mila Méndez Otero coa
reportaxe La
revolución silenciosa de los informáticos,
publicada o 23 de outubro de 2022 no diario La Voz de Galicia
e José Luís Jiménez Díaz coa reportaxe Explorar
el poder curativo de la música, publicada no
diario ABC o 17 de setembro de 2022.
O xurado salientou da reportaxe de Mila Méndez o feito de que
“aborda en profundidade e dun xeito obxectivo a concentración de
empresas do sector TIC na Coruña e a súa área de influencia,
empregando unha linguaxe clara e directa, que atrapa o interese do
lector desde o comezo e manteno ao longo das dúas páxinas,
empregando un estilo ameno e fluído”. Dende a Academia remarcan
que con esta reportaxe a xornalista “contribúe a divulgar un
aspecto pouco coñecido da ciencia desenvolta nos centros de
investigación e nas universidades galegas: a transferencia dos
resultados ao mercado a través da creación de spin-offs”.
A galardoada recibirá unha dotación de 3.000 euros.
En canto ao segundo traballo mellor valorado, a reportaxe de José
Luís Jiménez Díaz, valorouse que se trata dun “traballo
xornalístico que dá a coñecer un proxecto de investigación
realizado en Galicia, a través dun enfoque curioso -a toma de
mostras á entrada e saída dun concerto-“. Aborda o proxecto
Sensogenomic, desenvolto por un equipo do Instituto de Investigación
Sanitaria de Santiago (IDIS), que pretende medir a resposta xenética
do ser humano aos estímulos musicais co fin de estudar o potencial
terapéutico da música. O galardoado recibirá unha dotación de
1.000 euros.
Cómpre dicir que os premios entregaranse nun acto que se celebrará
o vindeiro 21 de xuño, ás 19 horas no Pazo de San Roque de
Santiago, estando o xurado desta edición composto pola secretaria da
RAGC, a académica Pilar Bermejo, que actuou como presidenta; a
vicerreitora de Comunicación e Relacións Institucionais da
Universidade de Vigo, Mónica Valderrama; Luís Manuel Villamor,
doutor en Ciencias da Comunicación da Universidade de Santiago; a
directora da Área de Centros de GAIN, María José Mariño; e a
técnico da Área de Programas de GAIN, Silvia López.