A Rede de Parques Científicos de Galiza, presentada como unha solución para a crise económica

Anxo Quintana, Teresa Táboas e Fernando Blanco na presentación da Rede de Parques Científicos e Tecnolóxicos de Galiza

No marco da presentación da Rede de Parques Científicos e Tecnolóxicos de Galiza, que tivo lugar hoxe en Santiago de Compostela, o vicepresidente da Xunta, Anxo Quintana, referiuse ao Sistema Galego de Innovación como “un antídoto” contra a crise económica derivada da dependencia excesiva do sector construtivo e do negocio inmobiliario, que non van todo o ben que deberían.
Neste acto, Quintana, recalcou a aposta da Xunta de Galicia por consolidar un modelo económico alternativo, “máis sólido e diversificado”, que permita medrar de xeito sustentable (cunhas empresas máis competitivas) a economía galega, a través da creación de emprego de calidade. A base sobre a que se está a construír ese modelo alternativo é, segundo apuntou Anxo Quintana, o Sistema Galego de Innovación, que supón “unha aposta pola formación, a investigación e a innovación aplicadas aos sectores produtivos tanto tradicionais como vangardistas”.
A devandita Rede de Parques Científicos e Tecnolóxicos presentada esta mesma mañá na capital galega está formada por 5 parques, distribuídos polas catro provincias e totalmente integrados cos sectores produtivos máis importantes de cada zona. Esta iniciativa é unha actuación da Consellaría de Innovación e Industria enmarcada no Plan Galego de I+D+i que ten como obxectivo, entre outras cousas, transformar o potencial de Investigación e Desenvolvemento latente nas empresas galegas en resultados comerciais e facilitar o acceso das empresas ás tecnoloxías máis innovadoras que hai na actualidade.
Trátase do Parque Tecnolóxico de Galiza (Tecnópole), en Ourense; da Cidade Tecnolóxica de Vigo (Citexvi); o Parque Tecnolóxico de Lugo; e os Parques Tecnolóxicos e Científicos de Santiago e da Coruña. A Rede irase pondo en marcha progresivamente entre os anos 2008 e 2012, e suporá unha mobilización de 435 millóns de euros para todo o período, con 2 millóns de metros cadrados de solo tecnolóxico que acollerán a máis de 550 empresas e a coa creación de 6.600 empregos directos.
No vindeiro mes de outubro procederase á constitución formal da Rede, que inicialmente incluirá aos tres primeiros parques xa creados: o Tecnópole e os parques de Vigo e da Coruña, e a finais de ano integraranse os dous restantes, coincidindo coa creación dos seus entes xestores. Asemade, a Rede seguirá aberta á incorporación de novos parques, sempre e cando reúnan as condicións de dinamizadores da I+D empresarial do seu contorno.
As iniciativas empresariais que desexen instalarse neles deberán ser admitidas por un comité de expertos externo ao parque, que avaliará o seu proxecto e velará porque a súa actividade se axuste á tipoloxía do parque, que, en todo caso, deberá de ser de base tecnolóxica. Así mesmo, as sociedades xestoras destes parques están constituídas por entidades públicas e privadas, tales como universidades, centros tecnolóxicos, Administración e empresas.

Rede de cinco

En tódolos parques que forman a devandita Rede de Parques Científicos e Tecnolóxicos da nosa comunidade, estarán presentes as catro tecnoloxías transversais importantes para a I+D en Galiza. Son os sectores da biotecnoloxía, da nanotecnoloxía, da enerxía e das tecnoloxías da información e a comunicación (TIC). Todas elas terán unha presenza preferente á doutros sectores, aínda que cada parque contará cunha determinada especialización.
Deste xeito, o Tecnópole, situado en San Cibrao das Viñas (Ourense), acollerá a sé da Rede e a súa experiencia servirá para asesorar e coordinar a súa posta en marcha. Conta actualmente cunha superficie de 550.000 m², aos que se engadirán outros 430.000 m² trala ampliación prevista. En 2012, a estimación do número de empresas que acollerá ascende a 180. Estas contarán cuns 3.000 empregados e unha facturación de 200 millóns de euros. Ao funcionar dende 1993 o espectro de empresas deste parque é bastante amplo, pero predominan as do sector enerxético (solar e eólico) e do bioagroalimentario.
A Cidade Tecnolóxica de Vigo (Citexvi), cunha superficie de 350.000 m², acollerá en 2012 a un cento de empresas, con 1.000 empregados e 100 millóns de euros de facturación. As súas áreas de especialización estarán baseadas nos sectores de telecomunicacións, eficiencia enerxética, automoción e tecnoloxía de materiais.
O Parque Tecnolóxico de Lugo disporá dunha superficie de 300.000 m². En 2012 calcúlase que serán 75 as empresas situadas nel. Darán emprego a 600 traballadores e traballadoras e suporán unha facturación de 50 millóns de euros. A especialización deste parque estará dirixida ao sector agrogandeiro.
O Parque Tecnolóxico e Científico de Santiago de Compostela contará cunha superficie de 500.000 m². Albergará a 100 empresas en catro anos, cun milleiro de empregados e 75 millóns de euros de facturación. O seu campo de especialización serán as iniciativas relacionadas coa biotecnoloxía médica e coa produción audiovisual.
O Parque Tecnolóxico e Científico da Coruña terá 300.000 m² de superficie que acollerán a un cento de empresas, con 1.000 empregados e unha facturación de 75 millóns de euros. O seu campo de especialización fundamental será o desenvolvemento de software e a enxeñería civil.