A UDC apoia a Mobile Week Coruña con charlas, mesas redondas e obradoiros
mércores, 21 de novembro do 2018
Comezou
a Mobile Week Coruña, o gran acontecemento tecnolóxico da tempada,
a nivel galego, estatal e internacional, e unha das cousas máis
salientábeis do evento é a súa importante capacidade de
mobilización e implicación. De feito, nela participan, con
apoios económicos e actividades, máis de 60 empresas e
institucións. Unha das máis sobranceiras é sen dúbidas a
Universidade da Coruña, que hoxe lembrou a gran listaxe de accións
coas que contribúe, un completo programa de charlas, demostracións,
mesas redondas e obradoiros para todos os públicos.
Para
comezar, o xoves 22 de novembro, o Campus Innova (Universidade da
Coruña) celebrará o evento Realidade virtual, aumentada e mixta.
Realidades de hoxe no espazo de intervención cultural NORMAL. O
obxectivo do evento, que contará cunha zona expositiva con
demostrábeis e cunha xornada de tarde con workshops e
charlas, é analizar casos prácticos de éxito que están a axudar
no presente en accións cotiás do día a día e analizar as
perspectivas de futuro destas novas realidades. Para iso contará coa
colaboración de diversas empresas e entidades entre as que se
encontran Kabel, Duacode, Xoia, Isostopy, Mobgen e a Axencia Galega
de Innovación (GAIN) a través do CIS Galicia.
Un
día máis tarde, a Facultade de Informática da UDC acollerá o
venres 23 de novembro no seu salón de actos, a mesa de debate
Comunicación e democracia que contará coa presenza activa,
entre outros, dos investigadores Amparo Alonso e Guillermo López
Taboada e abordará asuntos de actualidade como as novas falsas que
proliferan ao abeiro das redes (as fake news).
Sen
marcharmos da FIC, o sábado 24 de novembro a facultade será o
escenario do obradoiro A hora do código. Aprendendo a programar,
unha actividade dirixida a nenos e nenas que achegará a programación
de computadores “dunha forma natural, simple, intuitiva e
divertida”, segundo vén de informar a organización, que lembra
que na xornada do sábado, a Fundación Barrié acollerá a mesa de
debate Futuro dixital, para tod@s? na que participará Susana
Ladra, profesora da Facultade de Informática da UDC e directora do
Campus Innova.
Pola
súa banda, o paraninfo da Reitoría acollerá na tarde do sábado
dúas charlas que reflexionarán sobre a ética e a tecnoloxía con
participantes como Nieves Rodríguez Brisaboa, directora do grupo de
investigación Laboratorio de Bases de Datos (LBD).
Ademais,
o Centro de Investigación CITIC organiza e acolle ao longo de toda a
semana diversos obradoiros de robótica e Intelixencia Artificial,
tal
e como reflectimos hoxe mesmo dende Código Cero.
A
Universidade da Coruña recorda que todas as actividades son de
balde, aínda que é precisa a inscrición previa a través da
páxina web da Mobile Week Coruña onde poden tamén consultarse
todos os detalles do amplo programa.