A UDC estrea unha plataforma de educación en aberto

martes, 31 de xaneiro do 2023 Redacción

A Universidade da Coruña estrea unha plataforma de educación en formato MOOC na UDC Aberta co MOOC Xestión creativa do patrimonio e a paisaxe rural, no que participan oito socios europeos nunha iniciativa coordinada polo profesor da Facultade de Socioloxía da UDC, Manuel Docampo. Conta coa colaboración de Akademia Humanistyczno-Ekonomiczna w Łodzi (Polonia), Centro Italia (Italia), Fundación Uxío Nononeyra (España), GRM Novo Mesto (Eslovenia); Timesis Ltd – Montepisano DMC (Italia), UC Limburg (Bélxica), e a Universidade Católico Portuguesa (Portugal).
O curso Xestión creativa do patrimonio e a paisaxe rural ofrece unha aprendizaxe para o desenvolvemento das competencias necesarias para afrontar o reto da xestión creativa do patrimonio e a paisaxe cultural nas zonas rurais a medio e longo prazo. O seu obxectivo é formar aos participantes na xestión cultural e dinamización de maneira transversal, participativa e innovadora, comezando polo recoñecemento do valor estratéxico do patrimonio rural para conseguir territorios máis cohesivos e integrados, con maior participación social.
O curso está estruturado en catro módulos de aprendizaxe máis un módulo inicial para a introdución e un final destinado á avaliación. En cada un dos módulos o alumnado terá acceso a unha serie de leccións con materiais comúns como vídeos explicativos ademais de recursos de apoio escritos e actividades complementarias. O estudantado precisará aproximadamente un total de 20 horas de aprendizaxe ou cinco semanas para completar o curso.
Está destinado a técnicos e xestores de turismo ou patrimonio; coordinadores e monitores socioculturais; expertos e profesionais relacionados co desenvolvemento local, turismo cultural e patrimonio; estudantes e profesionais que precisen reciclarse cara novos tipos de turismo; emprendedores, habitantes do rural en xeral, graduados en Paisaxe e Historia da arte así como a persoas interesadas na materia.
Non se precisa experiencia laboral nin coñecemento previo. O curso é de balde.

PUBLICIDADE