A USC acolle un congreso que pon o foco nas luces e sombras das TIC no ensino

xoves, 30 de novembro do 2023 S. P.

O Campus Norte da USC, concretamente a Facultade de Ciencias da Educación, acolle esta semana (até mañá venres) un evento que pon o foco no uso das TIC no ensino, e nas vantaxes e riscos que as tecnoloxías ofrecen a profesorado e alumnado.
Estamos a falar do XXIV Congreso Internacional da Sociedade de Didáctica da Lingua e a Literatura (SEDLL) que se desenvolve baixo o lema A Didáctica da Lingua e a Literatura ante o reto da nova lei educativa e está organizado pola área de Didáctica de Lingua e Literatura do Departamento de Didácticas Aplicadas da Facultade de Ciencias da Educación compostelá.
Entre as máis de 150 charlas e presentacións inclúense temas coma comparación entre a capacidade de redacción das intelixencias artificiais fronte á de docentes do futuro, o desenvolvemento do hábito lector en inglés a través da promoción das videorreseñas de booktubers ou o deseño de ferramentas tecnolóxicas para deseñar un sistema de adestramento ortográfico destinado a persoas de lingua inicial portuguesa que queiran aprender a lingua española.
Amais, analízase temas específicos como o desenvolvemento de destrezas e estratexias auditivas a través de cancións pop na clase de lingua estranxeira, a aprendizaxe e a investigación lingüística a través das redes sociais ou a práctica de xogos en liña como xeito de aprendizaxe.
Entre as propostas máis destacadas do congreso tamén figura a mesa redonda que se desenvolverá este xoves 30 a partir das 16.00 horas no Salón de Actos da Facultade baixo o lema O fomento da lectura: a eterna materia pendente, que modera a profesora da USC Montse Pena Presas.