A UVigo co-organiza unha prestixiosa escola de verán sobre tecnoloxías sen fíos 5G
martes, 23 de maio do 2017
Unha
cita educativa e informativa de primeira liña, referencial se mire
por onde se mire, para formarnos en tecnoloxía 5G e albiscar alén
dela (na procura de novas potencialidades do acceso sen fíos 5G).
Así será a edición 2017 da Joint
IEEE SPS Eurasip Summer School on Signal Processing for 5G Wireless
Access, que se celebrará entre os días 29 de maio e 1 de xuño
na cidade de Gotemburgo. O
curso, que contará con presenza galega nas súas exposicións, vén
da man da Universidade de Vigo xunto ás de Chalmers, Linköping,
Texas en Austin e Aalborg. Trátase, máis polo miúdo, da nova
convocatoria dunha prestixiosa escola de verán que constitúe unha
xanela directa á investigación internacional en procesamento de
sinais para o acceso sen fíos 5G. Desta volta haberá catro bloques
temáticos principais: MIMO masivo, comunicación mmWave,
posicionamento e comunicación de máquina a máquina.
Entre as
e os relatores que intervirán nesta edición da escola de verán
está a docente e investigadora da Universidade de Vigo e do
seu centro AtlantTIC Nuria González Prelcic, coautora de máis
dunha vintena de artigos sobre tecnoloxías MIMO para onda
milimétrica e que ten impartido seminarios especializados en
congresos como ICASSP 2017, Globecom 2016 ou WCNC 2017. Segundo
informou a investigadora, será unha privilexiada oportunidade para
colaborar “con varias das universidades e investigadores que máis
teñen que dicir no tema das novas tecnoloxías 5G, que son
basicamente MIMO masivo e comunicacións en onda milimétrica”.
- A investigadora da Universidade de Vigo e do centro Atlanttic, Nuria González
Nuria
González, xunto ao docente da Universidade de Texas en Austin,
Robert Heath, co-organizou dúas sesións especiais sobre
comunicacións mediante ondas milimétricas en SPAWC 2015 e Asilomar
2016. Segundo engade en relación ás súas achegas na escola de
verán, “a tecnoloxía de onda milimétrica trata de operar a
frecuencias moi altas, da orde de máis de 30GHz, con grandes
estruturas homoxéneas de antenas, para acadar velocidades de
transmisión moi altas, moitas decenas e incluso centenas de xigabits
por segundo”. Estas velocidades, explica, fan realidade aplicacións
que “até o de agora non eran posíbeis, desde comunicacións
vehiculares de alta velocidade a módulos de comunicacións para
sistemas de realidade virtual”.
Na
escola de verán, ademais dos relatorios que ofrecerán algunhas e
algúns dos principais expertos no eido do procesamento de sinais
para comunicacións, tamén se impartirán relatorios a cargo de
representantes das empresas Huawei, Ericsson, Volvo ou China Mobile.