A Xunta aprobará o plan de benestar dixital antes do remate do ano

A Xunta de Galicia está a ultimar o Plan de benestar dixital do alumnado galego coa intención de aprobalo antes de que remate o ano, tal e como adiantou esta mañá a directora xeral de Ordenación e Innovación Educativa, Judith Fernández, durante a súa participación nunha mesa redonda sobre benestar dixital no marco do Salón Internacional de Tecnoloxía e Innovación Educativa (SIMO), en Madrid.
A representante da Consellería de Educación, Ciencia, Universidades e Formación Profesional destacou que este plan será a folla de ruta do Goberno galego para promover un uso saudable, seguro e responsable da tecnoloxía nas aulas. O obxectivo, explicou, é garantir o benestar emocional na infancia e na adolescencia, mellorar o rendemento académico e avanzar cara a un modelo de ensino híbrido no que convivan en equilibrio as metodoloxías tradicionais e as dixitais.
Para elaborar un documento rigoroso, solvente e consensuado que sirva de guía ao sistema educativo, o departamento educativo da Xunta constituíu un grupo de traballo integrado por especialistas en docencia, pedagoxía, psicoloxía, tecnoloxía e medicina. A creación deste Plan de benestar dixital responde así a unha demanda da comunidade educativa e enmárcase na futura Lei de educación dixital de Galicia, un texto pioneiro a nivel estatal e europeo que se atopa actualmente en tramitación.