A aceleradora Conector Galicia abre a súa primeira convocatoria
xoves, 6 de abril do 2017
- Lalo García, director de Conector Galicia, durante a presentación da súa alianza con ABANCA
A aceleradora de novas firmas innovadoras Conector
Startup Accelerator vén de dar máis pasos a prol do seu
afianzamento pleno e activo na nosa terra, logo do
primeiro anuncio da súa aposta galega, do que dimos conta en Código
Cero o pasado mes de novembro. Segundo informaron hoxe os
impulsores de Conector Galicia (entre os que se atopa un socio local,
Lalo García, fundador
de propostas de innovación tan salientábeis como Lancetalent,
Knowledge Investors e a
plataforma de préstamo de libros electrónicos Xebook),
a iniciativa vén de abrir a súa primeira convocatoria (até o 15 de
maio) para o programa de aceleración de seu. Conector Galicia
convértese deste xeito e coa colaboración da Xunta nunha nova
aceleradora dentro da Rede de Aceleradoras de Galicia.
A súa actividade centrarase na procura de novas
firmas innovadoras (start-ups) tecnolóxicas en fase semente
(fase seed) e “con potencial de medre e cun equipo formado”.
O programa pasa por poñer en marcha a fase de aceleración no mes de
xuño. “Buscamos proxectos co equipo formado e o líder claro,
startups con potencial de evolución e de
internacionalización”, sinala o equipo impulsor de Conector
Galicia, engadindo que a partir do 15 de maio, data de peche do prazo
para a recepción de propostas, preseleccionaranse os proxectos que
logo serán presentados ante os mentores de Conector no Startup
Day, evento privado onde os socios e mentores votarán e elixirán
as propostas que merecen entrar no programa de aceleración
propiamente dito.
Durante os 5 meses que dura a dita fase de
impulso, os emprendedores seleccionados recibirán unha serie de
servizos que lles permitirán acelerar o seu crecemento. Nun plano
máis específico, as novas firmas que entren en Conector Galicia
recibirán charlas de formación, espazo de co-working de
balde, apoio por parte de profesionais, entrada ao ecosistema
emprendedor estatal, acceso á rede de investidores de Conector e ao
asesoramento do seu board de mentores (“formado”, en
palabras dos responsábeis da palestra empresarial, “polos mellores
profesionais do sector dixital galego e español”. O programa
culminará co Demo Day, un evento privado no que os
emprendedores terán a posibilidade de presentar a súa proposta
diante dos investidores e os business angels.
Colaboración con Abanca
Como recordaremos, o pasado mes de febreiro o
centro
Abanca Innova recibiu formalmente
no seu programa de aceleración a Conector Startup
Accelerator.
Froito disto é o Programa de Aceleración
Abanca Innova by Conector, que procurará
apoiar e acelerar o crecemento de proxectos en fase semente de
sectores vencellados á banca (fintech, insurtech, regtech,
Big Data, blockchain...) e aplicará a metodoloxía Conector de
xeito presencial, estando aberta a recepción de solicitudes para
participar neste programa que botou a andar o 20 de marzo. As
startups seleccionadas recibirán até 20.000 euros a través
dun préstamo participativo, beneficiándose tamén os proxectos
acelerados das axudas das empresas colaboradoras da aceleradora,
terán acceso á rede de networking de Conector, recibirán
charlas de formación semanais e terán un panel de mentores de seu,
formados por expertos en diferentes áreas.