A animación e a realidade virtual, eixes dunha nova misión comercial inversa do CLAG
luns, 15 de xullo do 2019
O
Clúster Audiovisual de
Galicia vén de celebrar un novo encontro con empresas do
exterior: unha misión comercial inversa (con Galicia como destino, e
non ao revés) para intercambiar experiencias e, sobre todo, para
establecer alianzas arredor de novos proxectos. A reunión (xeiras de
networking en formatos informais) celebrouse o pasado venres
no marco do festival coruñés Mundos
Digitales (18 edición) e nela, amais das representantes do
Clúster, participaron empresas referentes mundiais da animación, da
realidade virtual e dos efectos especiais.
A
nosa terra estivo representada por compañías como Adivina
Producciones, Filmax ou Ilux Visual Technologies. Por parte da
delegación internacional participaron Ian Mackinnon, de
Mackinnon&Saunders; Jerome Denjean, de Blur; Raúl Carbó, de In
Efecto; Ali Hamdam, de Karlab; Guillermo Arambulo, de Sony Pictures
Animation; Pedro Dominguez, de Nu Boyana Portugal; Julio del Rio, de
MPC; Mauro Frau, de Treehouseninja; Frank Vedvik, de The Future
Group; Mike Seymour, de FXGuide; Jordi Barés, de Framestore; Jesús
Garrido, de ILM, e Josep Antoni Ribas, de MPC.
A
misión comercial, realizada dentro do Programa Galicia Exporta
Organismos Intermedios, co apoio financeiro de IGAPE, Xunta de
Galicia e UE, puxo de manifesto, en palabras da plataforma
audiovisual galega, “a decidida aposta que está a realizar o
Clúster Audiovisual Galego polos contidos dixitais e por contribuír
a que este sexa un sector máis forte e competitivo”.