A aplicación móbil galega Wizapet facilita a adopción de mascotas
luns, 22 de xaneiro do 2018
No
outono de 2016 nacía unha aplicación móbil galega chamada Wizapet, que
facilitaba a publicación de anuncios de mascotas perdidas ou atopadas aproveitando
o feito de que os smartphones integran GPS para achegar só a información nas
nosas proximidades. Este proxecto persoal do emprendedor ourensán Roberto
Carlos Pérez Álvarez O Reberete leva todos estes meses
evolucionando e adaptándose ás demandas dos seus máis de 45.000 usuarios
activos en España, o que facilitou que agora vexa a luz a súa versión 3.0, que
incorpora novas funcionalidades como buscador interno, filtros por tipoloxías
de mascotas, personalización das alertas por radio de busca e tipoloxía,
compartir anuncios e alertas en redes sociais, múltiples fotografías para cada
mascota, máis estabilidade e, moi especialmente, a xestión de adopcións.
Wizapet está dispoñible globalmente e de
balde, podendo descargarse nas súas versións para
Android e para iOS, e
estando consolidada como a meirande ferramenta dixital de carácter colaborativo
para a xestión de mascotas perdidas e atopadas en fala hispana.
Este tipo de ferramentas gozan de grande popularidade entre as asociacións
protectoras de animais e os seus simpatizantes, e o feito de que na súa última
versión poida empregarse para dar visibilidade a animais en adopción supón un importante
servizo para paliar a situación actual de abandono de moitas mascotas. Aparte
da difusión a través da aplicación móbil, Wizapet tamén facilita a publicación deste
tipo de anuncios en redes sociais, amplificando o seu impacto.