A axencia Elogia logrou en 2021 un crecemento do 51%

venres, 4 de febreiro do 2022 S. P.

JPEG - 128.2 KB
A sede de Elogia en Vigo

A axencia de mercadotecnia dixital Elogia, que ten unha das súas sedes principais en Vigo, fixo balance da súa actividade en 2021 e achegou, tamén, a súa folla de ruta para o ano que vén de comezar. Segundo explican fontes da empresa, esta obtivo un crecemento de marxe neta do 51% no último ano e unha marxe bruta de máis de 6 millóns de euros. Estes logros débense en parte á crise sanitaria e a unha meirande concentración de esforzos publicitarios e de comunicación no mundo dixital, “buscando apoio en colaboradores expertos para maximizar as oportunidades da canle”.
Como resultado, engade a axencia no seu balance, o comercio electrónico disparouse de forma exponencial en España, alcanzando xa máis de 13.600 millóns de euros no último cuadrimestre do 2021 e superando o anterior exercicio en case un 14% máis de facturación.
A axencia, que conta entre os seus clientes con marcas como Coca Cola, Carolina Herrera, Volvo ou Lenovo, pechou 2021 sumando marcas como PC Componentes e CEPSA á súa carteira de clientes.
Ante este panorama, Elogia reforzou a súa estrutura durante os últimos meses con dúas novas áreas de negocio e máis de 40 perfís especializados en ecommerce, ademais do nomeamento de Álvaro Gómez, ex-Google e até o momento responsábel da división española de Elogia como director executivo (CEO) da axencia a nivel internacional.
Ao devandito nomeamento súmase o de Lucía Ochoa como directora executiva (CEO) de Elogia México, reforzando “así a estratexia da axencia a nivel internacional” e “logrando unha comunicación constante ás dúas beiras do Atlántico co fin de crear sinerxías e compartir coñecementos”.
Entre os proxectos levados a cabo este ano, a axencia destaca o lanzamento do ecommerce da marca estadounidense Gap en España, levando a cabo a xestión completa da estratexia dixital; a xestión completa da estratexia dixital de ecommerce da firma de alimentación Hero e o seu posterior impacto nas tendas físicas; e a parte de mercadotecnia dixital da estratexia de negocio en Teka.


PUBLICIDADE