A ciencia e a tecnoloxía bótanse á rúa en setembro da man das tres universidades galegas e o seu evento conxunto G-Night
mércores, 26 de maio do 2021
Ás
portas do vindeiro outono celebrarase un sobranceiro evento
internacional para celebrar o coñecemento, a investigación e a
tecnoloxía. Trátase da Noite Europea das Persoas Investigadoras,
que se festexa de xeito simultáneo en cidades de toda Europa o
último venres de setembro e que está a piques de chegar á súa
décima edición. Santiago,
Lugo, Vigo, Ourense, Pontevedra, A Coruña e Ferrol sumaranse tamén
a esta iniciativa a través da G-Night, o evento que se
desenvolverá o vindeiro 24 de setembro e que busca achegar a figura
da persoa investigadora no contexto galego, así como a investigación
e os seus beneficios, á sociedade en xeral. Porase o foco en
fomentar as vocacións científicas entre as novas xeracións.
A
Universidade de Santiago, a Universidade de Vigo e a Universidade da
Coruña impulsan de xeito conxunto o consocio que impulsa a G-Night
ou Noite Galega das Persoas Investigadoras baixo o lema Conciencias
creativas.
Porase
o foco en cuestión como “a creatividade e a súa relación co
coñecemento científico”, “a ruptura de estereotipos” e “a
interdisciplinariedade”. Tamén se abordará a importancia de
impulsar investigación científicas e tecnolóxicas para afrontar os
grandes desafíos do cambio climático. As actividades
desenvolveranse fóra dos laboratorios e en “contextos informais”
como rúas, prazas, museos, praias ou bares, prevalecendo un ambiente
festivo para toda a celebración, sinalaron as tres universidades
galegas, engadindo que os formatos tamén serán variados e
enriquecedores: relatorios, conferencias, obradoiros, rutas
científicas, teatro, música, experiencias ou experimentos integran
a oferta da G-Night, alén de dirixirse a todo tipo de públicos con
independencia da súa formación e coñecementos.
- As vicerreitoras de Comunicación e Relacións Institucionais, Mónica Valderrama, e de Investigación, Belén Rubio, na presentación do programa de actividades dende a UVigo
Unha
xornada de actividades
Malia
que será na noite do 24 de setembro cando se celebren a maioría de
actividades programadas co gallo da G-Night, ese mesmo día pola mañá
están previstas de xeito excepcional diversas accións en centros de
ensino que garantan a seguridade das e dos participantes, “co
obxectivo de evitar aglomeracións de público escolar no horario de
tarde-noite”.
Por
certo que o alumnado dos centros escolares galegos de Primaria e
Secundaria será o primeiro, a partir da próxima semana, en gozar
coa celebración dunha vintena de pre-eventos, actividades
divulgativas, que teñen o obxectivo de difundir a celebración do 24
de setembro.
Cun
financiamento de preto de 154.000 euros, procedentes do programa
marco H2020, a través das Marie Sklodowska-Curie Actions (MSCA), as
Universidades de Santiago e A Coruña, o Centro de Supercomputación
de Galicia (CESGA), a Unidade de Cultura Científica da Delegación
do CSIC en Galicia e o Instituto de Investigacións Mariñas, o
Centro Oceanográfico de Vigo (IEO, CSIC), o Centro Tecnolóxico
Gradiant, o ITMATI, o INIBIC e o SEBBM integran o consorcio,
coordinado
pola UVigo, que desenvolverá a Noite Galega das Persoas
Investigadoras, que ademais de nas cidades galegas, celebrarase de
xeito simultáneo en máis de 360 localidades de toda Europa.
Na
UDC o proxecto está coordinado pola Unidade de Divulgación
Científica e contribúen todos os centros de investigación (CITIC,
CICA, CITEEC e CIT) e os campus de especialización: Innova,
Sustentabilidade e Industrial. O Centro de Investigación TIC tomará
parte a través de actividades e visitas ao Demostrador Tecnolóxico,
recentemente inaugurado, no que se expoñen diferentes proxectos de
investigación desenvolvidos no centro.
Precedentes
No
ano 2019, máis de millón e medio de persoas, de máis de 400
cidades de case unha trintena de países europeos, participaron na
Noite Europea das Persoas Investigadoras, na que ademais tomaron
parte máis de 36.000 investigadoras e investigadores. En 2020, o
evento celebrouse de xeito virtual cun total de 52 noites en
29 países.