A compañía californiana Denodo recibe o Premio Iniciativa Empresarial do CPEIG

A gala que celebra O Colexio Profesional de Enxeñaría en Informática de Galicia (CPEIG) baixo o nome de XVI Noite da Enxeñaría en Informática de Galicia 2024 terá lugar o 21 de xuño no Hotel OCA Puerta del Camino de Santiago. Neste acto farase entrega do Premio Iniciativa Empresarial á empresa Denodo, compañía referente na xestión de datos, con sede en Palo Alto (California) e presenza no mercado a nivel mundial a través de 30 oficinas establecidas nos principais núcleos empresariais, con tres centros técnicos globais situados na India, na Unión Europea e nos EE.UU., contando cun equipo directivo distribuído xeograficamente por todo o mundo.
Achegándonos máis a esta empresa californiana, dicir que foi fundada polo seu director executivo (CEO), o galego Ángel Viña, en 1999. Denodo xurdiu a partir de proxectos de investigación desenvoltos na Universidad Politécnica de Madrid e na Universidade de A Coruña (UDC). A investigación, dirixida por Viña
exploraba o uso de tecnoloxías de acceso e integración de datos en tempo real para acelerar o tempo de uso dos datos en complexos sistemas de datos distribuídos. O obxectivo era acelerar o proceso de recompilación e entrega de datos mediante a unificación semántica das fontes de datos que interveñen nun ecosistema informático distribuído típico.
Viña recoñeceu axiña que os métodos tradicionais de integración de datos tiñan limitacións para abordar en tempo real a entrega de conxuntos de datos desde unha infraestrutura de datos en continuo crecemento, no que se refire a número de fontes de datos, diversidade de tecnoloxías de datos e volumes de consumo de datos.
En resumo, Denodo Platform emprega a virtualización de datos, un enfoque de integración de datos que permite aos usuarios integrar datos sen replicalos, tendo arestora máis de 700 clientes de 35 sectores diferentes.
Alberto Pan, CTO da compañía, recollerá o galardón na XVI Noite da Enxeñaría en Informática de Galician nun evento que serve de eixo de unión entre as colexiadas e colexiados do CPEIG e un gran número de empresas e profesionais TIC de Galicia.