A consultora galega Vitae sela un acordo con Dathum

martes, 28 de novembro do 2023 S. P.

A consultora tecnolóxica Vitae, centrada nos recursos humanos, na formación TI avanzada, no desenvolvemento das capacidades profesionais e na dixitalización, selou un acordo coa empresa Dathum, especializada en medir o comportamento humano nas organizacións en base a modelos matemáticos, aprendizaxe supervisada e automática e Intelixencia Artificial. Vitae, como recordaremos, é unha consultora con sedes en Vigo e na Coruña que conta no seu equipo con algúns dos principais formadores tecnolóxicos de Galicia e España.
Con esta alianza Vitae poderá utilizar as ferramentas de Dathum para mellorar a súa capacidade preditiva á hora de seleccionar e asesorar aos seus clientes. Do mesmo xeito, Dathum obterá por parte de Vitae máis coñecemento sobre o comportamento humano nas organizacións en base á experiencia e o coñecemento da consultora tecnolóxica galega.
Dathum é tamén o nome dunha ferramenta de People Analytics con capacidade preditiva do comportamento humano dos profesionais na empresas con respecto á súa satisfacción coas súas condicións laborais, co seu traballo, co seu equipo, co seu xestor e coa súa empresa, predicindo cunha fiabilidade do 85% a retención ou rotación dos empregados nunha compañía en base a modelos matemáticos, algoritmos de aprendizaxe supervisados e automáticos e IA.
Vitae, pola súa banda, é unha das consultoras tecnolóxicas máis relevantes do ámbito estatal. Entre os seus logros figuran os seguintes: xa entrevistou a máis de 14.000 profesionais e formou a más de 33.000, o 95 % do sector TI, polo que se definen como unha consultora especializada no lado humano da tecnoloxía.