A fenda dixital en Galicia redúcese a tres puntos respecto á media española nos cativos de entre 10 e 14 anos

Unha das medidas máis importantes que recolle o Plano Estratéxico da Sociedade da Información (PEGSI) para fomentar un uso responsable da tecnoloxía entre os máis novos é apoiar ás empresas galegas para que elaboren contidos baseados na identidade, na diversidade e na igualdade, e software educativo tanto para a Rede como para o audiovisual. Ditas medidas semellan agora máis importantes ca nunca, xa que segundo datos da última enquisa do INE sobre equipamento e emprego das tecnoloxías nos fogares, máis do 67 por cento dos cativos galegos que teñen entre 10 e 14 anos xa empregan a miúdo a Rede.
O Instituto Nacional de Estatística indica que a porcentaxe de rapaces galegos que se conectaron á Rede nos últimos tres meses está moi próxima (xa) á media estatal. Deste xeito, mentres no conxunto do estado español a porcentaxe de nenos e nenas de entre 10 e 14 anos que se conectan a Internet é de 71,1, en Galiza a mesma taxa sitúase no 67,2, é dicir, menos de tres puntos de diferenza por debaixo da media. Non acontece o mesmo no tramo de idade que vai dende os 16 ós 74 anos, nos que a nosa terra anda a rentes dos 8 puntos por debaixo da media estatal, deixando en evidencia a máis que pronunciada fenda dixital (da que tanto se vén falando nos últimos anos).