A galega Alén, semifinalista nos premios da Fundación Everis ao emprendemento
luns, 4 de xuño do 2018
A
firma galega Alén vén de
chegar á semifinal dos premios da Fundación Everis ao
emprendemento, co que se coloca nunha posición óptima para chegar
ao remate do certame e aspirar aos 60.000 euros que se ofrecen ao
proxecto gañador. Alén,
para quen non o saiba, é unha spin-off da Universidade de Vigo
centrada no desenvolvemento de tecnoloxía espacial. A firma
galega chegou ás semifinais (categoría tecnoloxías industriais)
tras competir cun milleiro de proxectos procedentes dunha vintena de
países. A proposta coa que obtivo o billete para a recta final do
concurso consiste no desenvolvemento de satélites de baixo custe co
estándar da Axencia Espacial Europea.
O
concurso inclúe dúas semifinais, unha xa celebrada en Madrid e
outra prevista para xullo en Barcelona. Na de Madrid tamén foron
semifinalistas FoxID na categoría de novos modelos de negocio
dixitais e Somax na de saúde. Estas tres compañías competirán en
datas vindeiras con outras tres que se escollerán en xullo en
Barcelona, por un premio cunha dotación económica de 60.000 euros
para o desenvolvemento da empresa e un paquete de servizos de
asesoramento, valorado en 10.000 euros. O xurado do premio, integrado
por executivas e executivos de grandes compañías dos sectores
científicos e tecnolóxico, avalía os niveis de innovación, o
potencial de medre, a pegada social e a calidade do proxectos
presentados a estes galardóns, que xa suman dezasete edicións.
Os
responsábeis de Alén decidiron concorrer aos galardóns da
Fundación Everis “porque son un grande escaparate de visibilidade
e un premio moi valorado, xa que é global e ademais o grupo Everis
ten diversas liñas entre as que se atopa o espazo”. En canto ás
posibilidades que consideran que poden ter de gañar o premio,
comentan que “un sempre que chega á final cre que a pode gañar,
desde a humildade e sendo conscientes de que chegar ata aquí xa é
un premio. Descoñecemos os proxectos que se presentarán en
Barcelona, pero se teñen o nivel que vimos en Madrid será
complicado, xa que había grandísimos proxectos”, destacan. Un dos
integrantes de Alén, Antón Vázquez, lembra que neste intre a firma
atópase en fase precomercial, aínda que levan traballando como
grupo desde o ano 2007 e dentro do programa Ignicia desde setembro.