A galega Altia impulsa a utilidade dos datos públicos do Cabildo Insular de Tenerife
martes, 28 de decembro do 2021
O
Cabildo Insular de Tenerife adxudicou á tecnolóxica
galega Altia un contrato de dous anos para a prestación do servizo
de desenvolvemento, xestión, mantemento, evolución e difusión do
portal de datos abertos, Open Data Tenerife, que ten como
obxectivo converterse nun referente insular na difusión e
utilización de datos abertos.
Con
este proxecto, o Cabildo pon a disposición dos cidadáns, as
empresas, os investigadores e outras institucións públicas os
recursos de información publicados no dito portal a través dun
portal que facilita a súa reutilización e difusión por parte de
persoas e sistemas informáticos. O obxectivo é “contribuír á
transparencia da institución e fomentar o goberno aberto”, tirando
proveito do potencial social, económico e innovador que pon en xogo
este tipo de coñecemento sen cancelas.
A
empresa galega Altia reflicte que os principais beneficios deste
proxecto son que “permite ao Cabildo mostrar os servizos creados
con datos abertos; facilitar a federación de open data
doutros organismos dependentes do Cabildo; impulsar a creación dunha
comunidade e un ecosistema en Tenerife ao redor deste coñecemento;
profundar na automatización dos procesos de extracción,
transformación e publicación de datos abertos, e garantir o
aliñamento dos avances cos obxectivos definidos en Tenerife 2030 e o
Marco Estratéxico de Desenvolvemento Insular (MEDI) 2016-2025”.
En
palabras de Manuel Saz, director asociado de Altia, “este proxecto
reforza a posición da nosa empresa como compañía experta no
tratamento de datos, colaborando coas administracións públicas
locais no desenvolvemento e implantación de iniciativas tendentes a
facilitar o uso de información fidedigna por parte de cidadáns e
empresas co fin de contribuír ao desenvolvo socio económico do
país”.
A
empresa con sede en Oleiros conta para este proxecto con perfís
profesionais con ampla experiencia e alta cualificación en
tecnoloxías moi específicas, como ETL (transformación de datos),
CKAN, Python ou CMS, todas elas tecnoloxías OpenSource, e
“sen esquecer outros perfís vitais para esta iniciativa, na
que divulgación á sociedade para o seu posterior uso e
aproveitamento ten un papel predominante, como os de áreas como
mercadotecnia ou legal”, engade a compañía galega.