A galega Ednon achegará infraestrutura tecnolóxica nun megahospital de Panamá
xoves, 13 de febreiro do 2014
- José Manuel Ávila (xefe Produción Instalacións de Construcións Hospitalarias) e Pedro Toledano (general manager de Ednon International)
O Consorcio Construcións
Hospitalarias (formado por FCC Construción e FCC Construción de
Centroamérica) vén de adxudicar a Ednon Internacional, a filial da
compañía galega Ednon en
Panamá, a subministración e instalación de infraestrutura de
electrónica e comunicacións para a Cidade Hospitalaria Ricardo
Martinelli do devandito país centroamericano. Estes traballos de
achega tecnolóxica inclúen equipamento de distribución, sistema de
cable estruturado e electrónica de rede. Ao abeiro deste proxecto,
engade Ednon, emprazaranse tres mil metros “de bandexa galvanizada
en quente e dous mil cincocentos puntos de rede voz, datos e iPTV”.
O importe da licitación
da primeira fase ascende a 360.000 dólares. “A nosa división
internacional”, informa a firma santiaguesa, “sitúase con esta
adxudicación en disposición de abordar as seguintes oito fases do
proxecto”.
Por certo que a
adxudicación deste proxecto realizouse en competencia con empresas
españolas e internacionais e, en palabras da firma con sede en
Santiago, “supón un fito na internacionalización de Ednon en
Latinoamérica”. Pedro Toledano, responsábel de Ednon
International, manifestou a súa satisfacción pola confianza
depositada nos profesionais e nosa tecnoloxía da compañía que
representa e engadiu que “a través desta adxudicación pódese
amosar a nosa experiencia nas áreas de redes e comunicación e facer
medrar aínda máis nosa estrutura empresarial en Centroamérica,
acometendo outros proxectos nos que Ednon está a traballar na súa
licitación”.
- As obras da cidade hospitalaria de Panamá
Lembrar que o Consorcio
Construcións Hospitalarias (formado por FCC Construción e FCC
Construción de Centroamérica) adxudicouse a obra de construción da
Cidade Hospitalaria Ricardo Martinelli en Panamá por 587 millóns de
dólares. As instalacións sanitarias terán unha superficie
construída de 209.000 metros cadrados e disporá de 49 quirófanos e
1.709 camas. Este megaproxecto da Caixa de Seguro Social
(organismo equivalente á Seguridade Social española) terá a
capacidade de ofrecer servizos de atención a máis de tres millóns
de usuarios.
Polo que atinxe a Ednon,
dicir que é unha empresa galega especializada na integración de
servizos avanzados TIC. Fundada no ano 2004, e de capital privado
independente, opera en todo o territorio español a través das súas
oficinas en Santiago de Compostela, Valladolid e Madrid e no eido
xeográfico Latam&Caribe a través da súa filial Ednon
International, S.A. localizada en Panamá.