A galega Optare reforzará os sistemas da operadora Finetwork ante o seu rápido espallamento

Finetwork, operador de telefonía móbil e fibra para todo o territorio estatal, con sedes en Madrid e Alacante, vén de encomendar á empresa galega Optare Solutions a optimización dos seus sistemas, un proceso que permitirá mellorar a calidade do servizo aos clientes “en todo o seu ciclo de vida”. Finetwork é unha das operadoras de meirande proxección actual, cunha taxa recente de máis de 4.500 novos clientes de alta ao día, o que supón un gran desafío “a nivel de infraestrutura, sistemas e procesos”. Neste punto é onde entra en xogo a empresa galega.
Finetwork seleccionou a Optare Solutions como socio estratéxico para a análise e mellora da súa arquitectura de sistemas e procesos. Buscábase unha empresa con experiencia e coñecemento acumulado con capacidade para apoiar a unha operadora en fase de crecemento exponencial e rápido espallamento, como é o caso de Finetwork, que conta xa con máis de 700.000 usuarios.
Optare achegará á operadora “calidade do servizo ao cliente final e solucións coa capacidade de escalar en función das necesidades dos nosos socios”.
Manuel Hernandez, director de Finetwork explicou que “non buscamos provedores, senón socios que nos acompañen no noso camiño de crecemento”. E engadiu: “Optare Solutions ten o coñecemento de mercado e a experiencia, e o seu compromiso cos nosos obxectivos dános a confianza que esiximos”.
O director executivo de Optare Solutions, Luis Alvarez Sestelo considera a Finetwork como “un cliente próximo, con moita ambición, co que é un pracer colaborar. O seu compromiso cos clientes é similar ao noso e por iso encaixamos moi ben desde o primeiro día”. Segundo lembra o CEO da empresa galega, Optare Solutions dispón de vinte anos de experiencia dando servizo a algunhas das principais operadoras de telecomunicacións do mundo: “Con máis de 140 empregados e presenza nacional e internacional, a nosa é hoxe unha das consultoras do ámbito IT máis relevantes no sector das telecomunicacións en España, prestando servizos de consultoría, integración e desenvolvemento de sistemas de soporte á operación e ao negocio”.