A plataforma galega Vidiv acada a máxima contía dos Next Generation
martes, 8 de febreiro do 2022
Vidiv,
plataforma galega dirixida para retransmitir grandes eventos, vén de
comunicar que foi seleccionada entre os máis de 570 proxectos de
base tecnolóxica que se presentaron á iniciativa Neotec, organizada
pola entidade pública empresarial CDTI, dependente á súa vez do
Ministerio de Ciencia e Innovación. Finalmente, 125 proxectos de
toda España beneficiáronse destas axudas Next Generation para
impulsar a creación e consolidación de novas empresas de base
tecnolóxica en España; dos cales en Galicia só hai 5
contribucións, sendo Vidiv unha delas. En virtude delas, acadou a
contía máxima: 250.000 euros.
Para
Alfonso Gutiérrez, director executivo de Vidiv, que a plataforma
fose elixida para a convocatoria de Neotec “supón unha excelente
noticia”, e máis tendo en conta o alto nivel dos proxectos que
concorreron, algúns deles moi maduros e con empresas con maior
facturación que Vidiv e plenamente consolidadas. “A nosa fortaleza
determinante para os avaliadores de CDTI”, informa, “foi tanto os
retos tecnolóxicos da compañía como a excelente descrición
técnica achegada na memoria presentada, que segundo os examinadores
estaba moi por enriba do habitual nesta convocatoria”.
Vidiv,
desenvolvida durante a pandemia dende Visual MS co obxectivo de
achegar unha ferramenta que fose alén das simples vídeo-conferencias
e conseguise “transmitir as emocións”, permite reunir a dez,
cen, mil, dez mil ou infinitos participantes: todos co seu sitio no
espazo onde se celebra o evento. Este espazo coñécese como area, en
clara referencia ao lugar do antigo coliseo romano onde collían
corpo os grandes acontecementos da época clásica. “É nesta area
dixital, a do século XXI, onde os usuarios poden compartir risas,
aplausos, aprobación; e tamén críticas e descontento”, explican
dende Visual MS, con sede no Porriño, engadindo que “a area ve,
escoita, sinte e vibra coa participación de todos os relatores”.
Ademais, estes poden obter resposta en tempo real e coñecer o que
gusta nun intre determinado.