A resposta háptica non funciona nas notificacións do novo iPhone SE

Agora que o novo iPhone SE chegou ás tendas vanse coñecendo detalles que non se deran a coñecer publicamente durante a súa presentación, como a confirmación de que a súa cámara é a do iPhone 8 actualizada por software (e non a do iPhone Xr como insinuaran algúns medios) e un detalle bastante polémico: a función de resposta háptica non funciona de xeito completo.
Apple introducira nos seus móbiles o 3D Touch, unha tecnoloxía que permitía detectar a forza coa que se premía na pantalla, para que con pulsacións fortes puidesen activarse certos atalos dun xeito semellante a como funciona o botón dereito dun rato nun equipo informático, pero pouco a pouco foi substituíndose por pulsacións prolongadas con resposta vibratoria, o que supón un aforro en compoñentes e espazo nos dispositivos, pero que no caso do iPhone SE sorprende porque esta resposta háptica non está dispoñible nas notificacións, carencia denunciada por múltiples usuarios e confirmada polo servizo técnico de Apple. De feito, incluso o editor xefe de TechCrunch confirmou que este comportamento do iPhone SE non é un fallo, senón que trátase dalgo intencionado, o que semella un simple recorte de prestacións ao estarmos ante un modelo de móbil máis barato, e que non atende a ningún motivo técnico.
Quedan usuarios que confían en que o rebumbio que está a provocar isto leve a Apple a publicar unha actualización para activar a resposta háptica nas notificacións, aínda que cómpre advertir que iso podería non ser así, xa que existe un xeito alternativo de suplir tal carencia: é posible deslizar ás notificacións á esquerda e premer na opción de ver para conseguir o mesmo resultado que unha pulsación prolongada.