A serie galega Tutu poderá verse en Clan

En breve as nenas e nenos de todo o ámbito estatal poderán ter acceso directo nos seus televisores á serie de animación galega Tutu, impulsada e creada pola produtora TIC Ficción Producciones, firma adicada á produción audiovisual innovadora e aos contidos ligados ás novas tecnoloxías. Segundo nos conta o Clúster do Audiovisual, Tutu foi un dos catro proxectos de animación seriada seleccionados por RTVE na convocatoria de 2015. En virtude disto, a serie galega poderá verse dentro duns meses a través ca canle pública Clan, especializada en achegar debuxos animados e series infantís a través da grella de TV e, tamén, a través da web de seu (con contidos de balde).
Tutu, como lembraremos, é un produto transmedia que conta as aventuras dun pequeno canguro motorizado, “optimista e positivo”. Artéllase, a nivel de formatos, nunha serie de TV e máis nun videoxogo educativo do mesmo nome, para móbiles e tabletas, operable para as tres grandes plataformas, iOS, Android e Windows.
Neste proxecto, RTVE valorou a evolución do proxecto nos últimos anos, a súa calidade formal e a súa visión integradora, positiva e natural, segundo indican nunha nota de prensa e reflicte o Clúster. Tamén salienta “o coidado na creación da música baixo o método pedagóxico ORFF e conta cun conxunto de aplicacións e xogos”.