A tecnolóxica Tecalis dispara o seu beneficio un 282%
xoves, 14 de outubro do 2021
- Os socios fundadores da firma galega, Isidoro Martínez, director executivo (CEO) de Tecalis, e Alberto Campos co-fundador e COO da compañía
A
empresa tecnolóxica galega Tecalis
vén de facer balance dos seus logros recentes, poñendo o foco tamén
nos seus seguintes movementos estratéxicos. No reconto inclúese un
importante fito en materia de negocio: a firma con sede no Polígono
de Novo Milladoiro foi quen de disparar o seu beneficio nun 282%,
acadando un EBITDA de 1.168.508 euros, así como unha rendibilidade
financeira (ROE) do 48%. Xa nun plano futuro, a previsión é de
superar os 7 millóns de facturación en 2021. Na folla de ruta
inclúese a seguinte estratexia firme: destinar o cen por cen do
beneficio ao financiamento da súa expansión.
A
tecnolóxica, que impulsa procesos de crecemento e transformación
dixital a clientes en máis de 20 países, mostrouse moi optimista
con estes resultados, e manifesta a súa previsión dun importante
incremento das vendas en 2021 “grazas á evolución global do
mercado” e “á tracción que está a xerar a tecnoloxía de
Tecalis no mesmo”.
Segundo
fai saber a compañía no seu balance, un dos factores clave que
provocaron este proceso acelerado de medre é “a rápida adopción
da súa nova plataforma de identificación en liña e sinatura
electrónica por parte dos mercados e usuarios”.
No
informe tamén se dá conta de como nos seus 10 anos de vida, a
compañía presentou 9 exercicios en positivo e os últimos 4 “cunha
clara tendencia alcista”, até o punto de alcanzar un crecemento
próximo ao 300% no último exercicio fiscal. Este crecemento,
explica Tecalis, “reforza a consolidación do plan corporativo de
expansión da nosa organización, con presenza actual a nivel
internacional, seis oficinas, e clientes en máis de vinte países,
fortalecendo o obxectivo de converternos nunha empresa global”.
No
balance a firma galega tamén salienta o éxito obtido trala súa
experiencia como expositora e patrocinadora no evento que pasar por
ser o máis importante sobre fintech en
Europa, Money 20/20 (Amsterdam), onde pasou a converterse nun dos
principais actores da dixitalización do sector financeiro,
asegurador, bancario e relacionados, grazas ás solucións adaptadas
ás necesidades regulamentarias e estándares normativos, e máis a
tecnoloxía da empresa que resolve os retos vinculados á
produtividade, a eficacia, os custos e as novas necesidades abeiradas
ao onboarding e á contratación de servizos.
En
datas vindeiras, o 26 e 27 de outubro en Londres, Tecalis presentará
en Total Telecom Congress 2021 “unha proposta de valor renovada
para a industria das telecomunicacións”.
Amais,
no evento Future Identity, previsto para a mesma cidade o 15 e 16 de
novembro, a firma galega presentará as últimas iniciativas,
tecnoloxías e solucións “que impulsan a identidade de confianza
universal”, para “poder construír un ecosistema de identidade
dixital único”, sinalan fontes de Tecalis.