A unidade de ciberseguridade de Telefónica lanza un detector de ameazas que garante a privacidade dos usuarios

ElevenPaths, a compañía de ciberseguridade parte de Telefónica Tech e vencellada tamén a unha estreita colaboración co centro galego Gradiant, vén de dar forma a un innovador detector de malware que respecta e garante a privacidade dos usuarios. Trátase de DIARIO, un novo concepto de loita contra a cibercriminalidade con capacidade para escanear e avaliar documentos de Office 365 e PDF sen necesidade de que o motor de análise acceda ou procese o contido. A ferramenta, desenvolvida polo equipo de Innovación e Laboratorio de ElevenPaths, extrae certas funcionalidades dos ficheiros (nunca o contido) e envíaas ao servidor. Este é quen de detectar decontado se o documento ten algún tipo de malware ou non.
DIARIO, segundo explica Telefónica, incorpora unha Intelixencia Artificial que foi adestrada ex profeso para detectar as ameazas que xeralmente escapan ás solucións tradicionais de antivirus. Por este motivo, analiza os documentos sen necesidade de acceder ao seu contido, “algo fundamental no caso de tratarse de arquivos de índole privada ou sensible”, explica a operadora, engadindo que un dos puntos que diferencia esta tecnoloxía doutras semellantes, baseadas tamén en aprendizaxe-máquina (Machine Learning), DIARIO caracterízase por respectar a privacidade (foi concibido cunha clara especialización en documentos nos que é necesario garantir a protección de datos de tipo persoal: PDF e Office 365), por ser intelixente (adestrouse o seu modelo de aprendizaxe cos indicios maliciosos menos recoñecibles polos antivirus tradicionais, para poder cubrir unha fenda que estas solucións non son capaces de ocupar) e por introducir un panel para analistas (co que os profesionais validarán e fortalecerán os seus protocolos de análise e estudo de forma cómoda e asistida).
DIARIO, que actualmente se utiliza internamente en Telefónica, é gratuíta e pódese empregar de xeito directo na súa páxina web oficial ou descargarse e instalarse no computador. “Ao ser unha ferramenta colaborativa, cuantos máis usuarios boten man dela mellor, xa que se comparte coñecemento de todos eles para que siga mellorando e poder ampliar a fórmula a outro tipo de ficheiros”, explica a operadora.