A web 2.0 acode en axuda do galego
mércores, 28 de abril do 2010
Moitos expertos aseguran que dende que apareceu o concepto
de web 2.0 por primeira vez, a Rede reinventouse a sí mesma e agora son moitas
as utilidades novas que ofrece Internet e as vantaxes que nos reporta o seu uso
diario. Porén, se en algo beneficiaron as aplicacións 2.0 á sociedade actual foi
no ensino, posto que a posibilidade de interacción entre membros da comunidade
internauta con aplicacións e administradores é infinita e os seus beneficios
académicos son incontables.
Este é un dos motivos polos que a Secretaría Xeral de Política
Lingüística, no marco do V Seminario de
Dinamización Lingüística no Ensino, decidiu incidir nas vantaxes que
ofrecen as aplicacións web 2.0 para desenvolver actividades de dinamización
lingüística nos centros de ensino do noso país, empregando ferramentas como
Drupal, como espazo colaborativo; de Moodle, como contorno virtual de ensino e de
aprendizaxe; e de Coppermine, como galería de imaxes e de vídeos.
O obxectivo das sesións Web 2.0, que retomaron onte a súa programación na Coruña e Vigo, non
é dar a coñecer con profundidade estas aplicacións, senón que, segundo informan
os seus responsables, “é comprobar o seu
potencial na dinamización da lingua galega nos centros educativos a través de casos
concretos, co fin de sacarlles o máximo rendemento”.
Durante as sesións de onte, os relatores convidados deixaron constancia de que as aplicacións
web 2.0 permiten conectar dun xeito rápido e eficaz a toda a comunidade
implicada na dinamización lingüística, e puxeron como exemplo os procesos
comunicativos e de colaboración tradicionais, xa que, segundo eles, “podían ocupar moito tempo e esforzo, convértense
en pequenas actuacións que poden chegar a un número moito maior de membros da
comunidade educativa”.
A Consellería de Educación e Ordenación Universitaria
anunciou, no marco destas xornadas, que pon a disposición dos centros que o
soliciten estas aplicacións a través do seu proxecto Webs Dinámicas; xa que, en primeiro lugar, apuntaron que “Coppermine ofrece múltiples posibilidades
para a creación de galerías de imaxes e de vídeos”. En canto a Drupal, aseguraron
que “con esta aplicación pódese crear e
configurar –dun xeito moi doado– un espazo web onde os usuarios rexistrados poden
realizar as súas publicacións de contidos multimedia: artigos, historias,
imaxes, vídeos, son...”. E finalmente, Moodle, como aplicación educativa,
está, segundo afirman, “especialmente
deseñada para a interacción entre os membros da comunidade escolar”.
Este ano, o
Seminario de Dinamización Lingüística no Ensino (dirixido ao profesorado, en
xeral, e aos membros e coordinadores dos equipos de dinamización e normalización
lingüística, en particular) centra a súa temática nas vantaxes das TIC para
fomentar o uso do galego nos centros educativos e desenvolverase ata o vindeiro
xoves nas cidades de Ourense, Pontevedra, Ferrol e Santiago de Compostela.