Abre o prazo para participar na 3ª edición da aceleradora de internacionalización Galicia Avanza

martes, 27 de febreiro do 2024 S. P.

Patricia Argerey, directora da axencia galega GAIN, na presentación da nova edición de Galicia Avanza

O programa de aceleración para a internacionalización de pemes galegas Galicia Avanza, posto en marcha en 2022 como resultado da colaboración entre GAIN, o IGAPE e a Tecnópole, ten aberto neste intre o prazo da terceira convocatoria, na que poderán participar ata 30 pequenas e medianas empresas innovadoras e/ou de base tecnolóxica. As solicitudes deberán presentarse ata o 19 de abril a través da páxina web do programa.
O obxectivo desta iniciativa, xestionada e coordinada por Tecnópole (Parque Tecnolóxico de Galicia), é que solucións innovadoras galegas, de calquera ámbito ou sector, dispoñíbeis ou moi próximas ao mercado, acaden ou fortalezan a súa presenza no mercado exterior no menor tempo posíbel. “O programa aspira a que as empresas beneficiarias consigan reforzar a súa consolidación internacional, ademais de abrirse a novos mercados”, sinalan dende a Tecnópole, engadindo que o método de traballo pon o foco na protección das súas marcas e deseños industriais ou intelectuais, na detección de posíbeis colaboracións con outras empresas, no acceso a novos segmentos de clientes, así como na atracción de financiamento externo, entre outros aspectos.
Como principal novidade desta edición e co fin de dar oportunidade a novas pemes innovadoras, non van poder ser beneficiarias empresas que xa teñan participado en convocatorias anteriores do programa. Á hora de seleccionalas, valorarase o potencial de internacionalización e o grao de innovación dos seus produtos ou servizos, o coñecemento do mercado internacional obxectivo, o potencial de crecemento no mercado exterior, a capacidade financeira da empresa e a súa experiencia previa no eido internacional. Ademais, incentivarase a participación de pemes que non recibisen axudas previas da Axencia Galega de Innovación nin de Tecnópole, e tamén se primará a porcentaxe de mulleres nos seus cadros de persoal.
Galicia Avanza ofrece un programa integral de apoio á internacionalización de dez meses de duración, con itinerarios personalizados en eidos como o estudo do mercado, a estratexia de mercadotecnia (marketing), a adaptación de produtos e servizos, o deseño e rexistro de marcas e certificacións ou a estratexia de acceso ao mercado. Ao longo do programa, as empresas participantes tamén recibirán mentorización, asesoramento e formación comercial e técnica.
Durante os primeiros dous meses, titores expertos coñecedores do desenvolvemento de negocios e a internacionalización de produtos e servizos prepararán itinerarios personalizados con cada unha das empresas, segundo as súas necesidades concretas. Durante os seguintes meses, o programa contratará os provedores de servizos profesionais que cubrirán as necesidades detectadas nos itinerarios, a empresa levará a cabo as actividades definidas no seu plan de acción e farase un seguimento. De xeito paralelo, os beneficiarios poderán acceder a unha carteira de consultores expertos en diferentes materias e recibirán formación transversal en temáticas relacionadas coas necesidades detectadas nos diagnósticos.
Nas dúas edicións anteriores do programa impulsouse a internacionalización dun total de 60 pemes de toda a comunidade, pertencentes aos sectores máis diversos.

PUBLICIDADE