Adobe lanza oficialmente a versión 5 de Lightroom

Adobe Systems anunciou hoxe o lanzamento do seu Photoshop Lightroom 5 para Windows e OS X, podendo xa adquirirse de xeito independente por 127,92 euros (72,57 euros de actualizar dunha versión anterior) ou dentro de Adobe Creative Cloud, buscando contribuír aos fluxos de traballo de fotógrafos profesionais e entusiastas que queiran sacar o mellor das súas imaxes dixitais.
Lightroom 5 engade novas ferramentas e edición para axudar aos fotógrafos a mellorar as súas imaxes dun xeito máis rápido, como un novo pincel corrector avanzado (que corrixe defectos nas imaxes provocados por po ou peluxe ou borrar algún obxecto), Upright (ferramenta para endereitar imaxes, detectando liñas horizontais e verticais), degradado radial (para crear efectos de viñeta non centrados)... Tamén facilita a creación de carruseis de imaxes en vídeo ou incluso libros con fotografías, e tamén conta cun sistema de previsualización de imaxes que permite xerar copias pequenas das imaxes de grande tamaño sobre as que facer axustes que se aplicarán logo de xeito automático aos ficheiros orixinais.