Altia participa no desenvolvemento do novo sistema de xestión da UE en materia de medio ambiente

mércores, 16 de setembro do 2020 Sonia Pena

A empresa tecnolóxica Altia, con sede en Oleiros, e máis a firma navarra Tracasa son as encargadas do desenvolvemento do sistema Reportnet 3.0 da Axencia Europea de Medio Ambiente (o novo sistema de xestión de datos en materia green dos país membros da UE). A tecnoloxía materializada polo consorcio formado polas dúas ditas empresas permitirá que os informes nos que se detallan datos como a polución do aire, as augas residuais ou o ruído, sexan tratados “dunha maneira máis áxil, segura e eficiente”.
En concreto, os usuarios terán a posibilidade de definir e manipular de xeito gráfico as estruturas de información e as regras de validación dos informes procedentes de cada territorio. Altia explica que estes informes teñen unha serie de pasos preestablecidos para o seu reporte á axencia EAA, como “a definición do propio informe vinculado ao seu marco legal, validacións automáticas sobre os datos recompilados, verificación por parte do responsábel a nivel europeo e, finalmente, a súa publicación para o emprego noutros informes”.
Respecto das novidades e vantaxes que pon en xogo a actualización, a empresa galega lembra que até o de agora, a versión Reportnet 2.0 requiría un novo desenvolvemento ad hoc das estruturas de almacenamento, regras de validación, recepción de datos, etc, ao que compre engadir que a propia metodoloxía de funcionamento do sistema provocaba longos períodos de espera.
Pola contra, a solución proposta por Altia-Tracasa admite a creación de bases datos ao voo que recollan datos correspondentes a todos os países participantes no proxecto, “facilitando así o seu arquivo e mellorando a axilidade da xestión”. De feito, o obxectivo é que a tecnoloxía permita que todas as transaccións se leven a cabo en menos de 400 milisegundos. Ademais, para os servizos de negocio e infraestrutura, desenvolveuse un sistema arquitectónico que permita que, no caso de que algún dos servizos caese, outro puidese seguir operando no punto exacto onde o outro caeu.
En canto á mellora da seguridade do sistema, establecéronse unha serie de controis para garantir que só as persoas indicadas poidan acceder a recursos concretos, baseando a autenticación dos usuarios no sistema EuLogin empregado pola EEA.

PUBLICIDADE