Apple Pay chegará a España en 2016

Apple leva meses co seu servizo de pagamento baseado no móbil funcionando nos EE.UU., pero a expansión internacional de Apple Pay continúa a ser algo bastante incerto, pero durante a presentación dos resultados económicos de Apple para o trimestre fiscal que remata o pasado 26 de febreiro anunciaron que antes de rematar o presente ano o servizo funcionará en Canadá e Australia coa colaboración de American Express, para cruzar tamén a Singapur e Hong Kong durante 2016.
Pero este servizo que en xullo tamén comezou a funcionar no Reino Unido, quere espallarse por toda Europa, e aínda que os países nos que xa había plans eran Alemaña e Francia, finalmente parece que España adiantarase a estes dous países, de xeito que en 2016 teremos Apple Pay en España, aínda que non se detallou a data de lanzamento.
Esta nova ten bastante relevancia, non porque vaia ter un grande impacto económico (xa que o iPhone ten unha penetración moi reducida en España) senón polo efecto tractor que ten Apple no sector tecnolóxico, o que levaría a que as mesmas compañías que adopten Apple Pay fagan o mesmo con tecnoloxías que tamén funcionan con NFC (de xeito que empregarían os mesmos TPV) como Android Pay e Samsung Pay, polo que a partires do ano que vén moitos serán os usuarios que á hora de mercar un novo smartphone comecen a ter en conta se entre as súas especificacións está o NFC, xa que podería abrirlle unha porta a solucións de pagamento máis cómodas e áxiles.