Arquivan a causa contra a tenda coruñesa que vende cartuchos para Nintendo DS

A finais de 2009 a Policía Nacional interveu nunha tenda de videoxogos coruñesa milleiros de «cartuchos de falsificacións de videoxogos e dispositivos piratas dunha consola portátil», o que resultaba sorprendente porque os antecedentes xudiciais indicaban que non había nada ilegal na actividade do establecemento herculino, o que agora confirman no Xulgado de Instrución nº 2 de A Coruña, que entende que a importación e venda de cartuchos para as consolas de Nintendo non constitúen delito.
O auto xudicial decreta o sobresemento provisorio da causa tras a denuncia de Nintendo contra a tenda Todo Consolas, establecemento de grande sona, ao que acusaban de vulnerar os dereitos de propiedade intelectual e industrial da compañía nipona. O xuíz entende que «as tarxetas ás que alude o denunciante (..) tamén permiten outras funcións lexítimas tales como o emprego de xogos lexítimos doutros países, copias de seguridade de xogos orixinais, manexo de fotografías, escoitar música ou executar software libre», polo que desbota que constitúan un delito contra a propiedade intelectual, e suxire a Nintendo que recorra á vía civil se quere dirimir calquera vulneración dos dereitos industriais.