Arranca en Santiago LibreCon 2017 con 200 empresas e 60 relatores

Finalmente AGASOL (Asociación de Empresas Galegas de Software Libre) e a federación estatal ASOLIF abriron hoxe a edición 2017 do congreso LibreCon, centrado en facer fincapé nas moitas e variadas respostas que os programas abertos poñen (e porán) a disposición do desenvolvemento empresarial. Será, a todas luces, a gran festa galega, estatal e internacional do software libre, cun programa inzado de cousas salientables, como por exemplo un hackathon (Librehack) no que 50 participantes crearán en tempo real prototipos de software libre cos que mellorar a Industria 4.0 e o sector primario, ou a presentación, a cargo de IBM do sistema libre Qiskit (que serve para desenvolver computación cuántica, que ten entre as súas vantaxes introducir importantes inxeccións de eficiencia nos avances tecnolóxicos e económicos máis cruciais para a humanidade e o medio ambiente). LibreCon foi inaugurada ao fío das 11.00 horas. No acto participaron, amais dos responsables de AGASOL, ASOLIF e o Clúster TIC Galicia, o o director de Economía Dixital de Red.es, Alejandro Tosina, e a directora da axencia AMTEGA, Mar Pereira.
Segundo fixeron saber, no congreso están a participar máis de 200 empresas e 60 relatores, abordando o uso das tecnoloxías libres na Industria 4.0 e nos sectores primarios. Na inauguración do encontro, a directora da AMTEGA (entidade colaboradora do encontro) sinalou que “no actual momento de transformación dixital, o software libre ten demostrado a súa capacidade como solución competitiva no proceso de modernización de diferentes sectores”. Neste sentido, lembrou que “desde 2010 a Xunta colabora cos axentes do software libre galego na elaboración do seu Plan anual para impulsar o uso do software libre en todos os ámbitos da sociedade”. Isto, dixo, traduciuse xa en iniciativas docentes como o proxecto Abalar ou en iniciativas de eAdministración como o nodo de interoperabilidade das administracións públicas galegas (PasaXe), ou o sistema de xestión bibliotecaria.
Pratos fortes
Entre os pratos fortes desta edición de LibreCon, amais dos devanditos (os achegados por IBM e os participantes no Librehack), atópanse as contribucións de Antonio Fernandes, tecnólogo vigués e perito xudicial pola Asociación Nacional de Peritos Xudiciais Informáticos (ANTPJI) e a Asociación Mediterránea de Peritos Informáticos das TIC (ASPERTIC). Recentemente fichou como un dos especialistas da Axencia Europea de Seguridade das Redes e da Información (ENISA), co obxectivo de asesorar á entidade europea en estratexias para frear os cada vez máis frecuentes ciberataques que afectan a organismos públicos e empresas privadas.
Outro dos referentes do programa será a participación de de Nuno Troitiño, programador e apicultor 2.0 que presentará a aplicación Appybee, unha innovación made in Galicia capaz de detectar e controlar pragas que afectan ás colmeas de abellas, como a da avespa velutina (segundo lembra, ata o de agora este sistema xa logrou conter a mortalidade dos enxames e aumentar a súa produción nun 17%).