Arranca o FastMPJ Summer of Code 2012
xoves, 5 de xullo do 2012
O concurso Summer of Code 2012, organizado por un grupo un grupo universitario galego para demostrar as
vantaxes do desenvolvemento de proxectos en Java utilizando a librería de paso de mensaxes FastMPJ, vén de dar
comezo, e está aberto á participación de tódalas persoas interesadas nesta
linguaxe de programación.
O obxectivo deste
concurso é “chegar a desenvolver un
proxecto Java con paso de mensaxes con FastMPJ”, unha linguaxe desenvolvida
no Grupo de Arquitectura de Computadores da
Facultade de Informática (Universidade da Coruña), que conta co apoio, entre
outras entidades, da Fundación Barrié.
Para participar
non fai falla ter coñecemento previo sobre a programación FastMPJ xa que,
segundo informan dende a organización, “é
doado de aprender a partir da documentación achegada na páxina web e non é máis
que a unión de Java e MPI”.
O prazo de
presentación de proxectos, a través da
plataforma FastMPJ.com, estará
aberto ata o vindeiro día 13 de xullo, e poderán participar tódalas persoas que
o desexen.
Os proxectos desenvolvidos entrarán a formar
parte do repertorio de proxectos de Google Code, e en setembro, seleccionarase
o mellor que será galardoado cun tablet Nexus 7. Ademais, todos e todas as
participantes serán obsequiados cunha camiseta de FastMPJ así como coa
satisfacción de ter adquirido
coñecementos avanzados de programación paralela e de altas prestacións.
Un dos obxectivos desta
competición é o de aumentar a visibilidade de Java como linguaxe de
programación paralela “en contornas nas
que o rendemento é crucial (como na computación científica)” afirman, “e non se require experiencia previa no
manexo de FastMPJ, xa que se pretende que os participantes aprendan as
características principais deste modelo de programación”, engaden.