Arranca o préstamo de libros dixitais nas bibliotecas públicas, incluída (en breve) a de Santiago

O exterior da Biblioteca Pública Ánxel Casal visto na web de Ovo Publicidade

O Ministerio de Cultura vén de pór en marcha o seu proxecto para facilitar o préstamo de libros dixitais nas bibliotecas públicas. Segundo informa, o servizo estará habilitado en 15 centros do Estado ao longo de febreiro, incluída (calcúlase que a finais deste mes) a Biblioteca Ánxel Casal de Santiago de Compostela. O único requirimento que se nos vai esixir para carretar unha obra dixital destes centros vai ser o seguinte: rexistrarnos no servizo. De feito, semella que non será preciso ter un lector propio (un e-reader), xa que poderemos levalo da biblioteca cargado de libros electrónicos e telo nas nosas mans por un prazo de tempo que non irá alén das súas semanas.
O servizo funcionará de xeito semellante nas 15 bibliotecas deste proxecto, con algún que outro matiz. O orzamento achegado polo Ministerio é de 130.000 euros, partida necesaria entre outras cousas para costear a compra dos 750 lectores postos en xogo. O proxecto xa comezou a dar pasos en determinados centros de préstamo e lectura, como por exemplo a central de Cantabria, onde se puxo en marcha o 3 de xaneiro con 41 lectores e 184 libros electrónicos habilitados nas tarxetas. Polo de agora, que ninguén agarde levar a casa o ultimísimo en materia de best-sellers de novela negra, posto que as primeiras achegas limitaranse sobre todo a clásicos como O Quixote ou O retrato de Dorian Gray.