As claves para financiar os nosos proxectos con fondos Next Generation centran unha nova xornada de NOVATFE

mércores, 15 de decembro do 2021 S. P.

Este venres 17 de decembro vaise celebrar en formato streaming unha xornada sobre Financiamento de proxectos e fondos Next Generation. Trataranse diferentes aspectos que temos que ter en conta para acadar o meirande respaldo ás nosas iniciativas de innovación en materia de investimento, poñendo o foco nos novos fondos europeos ao servizo do transformador e da sustentabilidade. A inscrición á xornada, abeirada ao proxecto Interreg Poctep NOVATFE e organizada pola Dirección Xeral de Administración Local da Xunta, pode formalizarse en liña.
A actividade desenvolverase como dixemos en formato online, a través de Zoom en horario de 11.00 a 14.00 horas, e será impartida por persoal da empresa Eur-Funding. Contarase, de feito, coa presenza de Rodrigo Sanz, experto en desenvolvemento de negocio e relacións institucionais europeas da dita compañía.
Segundo a organización, é unha xornada de gran interese para técnicos de admininistracións ou entidades locais e tamén para pemes dada a orientación público privada de moitos dos fondos europeos que están próximos a convocarse.
O proxecto
NOVATFE é un proxecto dirixido ao desenvolvemento de novos modelos de negocio baseados nas chamadas Tecnoloxías Facilitadoras Esenciais (TFE). É unha iniciativa de cooperación transfronteiriza Interreg POCTEP NOVA TFE, cuxa finalidade é apostar por novos modelos negocio ao redor destas tecnoloxías, especialmente ás vinculadas á fabricación avanzada (fabricación aditiva, fabrica 4.0) e TIC (Industria 4.0, Internet das Cousas, Cidades Intelixentes).
O proxecto NOVATFE persegue achegar ás pequenas e medianas empresas de áreas non urbanas do espazo de cooperación ás estruturas de investigación e transferencia existentes (rede específica), apoiar novos modelos de negocio innovadores e intensivos en tecnoloxía (TFE) a través de estratexias innovadoras (laboratorios de experimentación e prototipado), e acompañar ás pemes na súa procura de socios, provedores e financiamento.
O proxecto ten o impulso da Universidade de Vigo, a Mancomunidade do Salnés, a Deputación de Ourense, a Xunta de Galicia (Vicepresidencia primeira) e o Municipio de Valença.

PUBLICIDADE