As galegas Xoia Software e Hustlers Watches locen innovación na New York Fashion Week

As tecnoloxías das empresas galegas tamén foron presentadas os días pasados en Hong Kong

A semana da moda de Nova York, que comeza hoxe, conta por vez primeira con dúas empresas galegas de pequeno tamaño. Trátase de Xoia Software Development e Hustlers Watches, dúas firmas innovadoras da nosa terra que acoden á devandita feira cos mellores vimbios: por unha banda as súas revolucionarias propostas en reloxería e realidade aumentada e, pola outra, unha experiencia de éxito a semana pasada en extremo oriente, na Hong Kong TDC Watch & Clock, onde deron a coñecer os novos modelos de reloxos de Hustlers Watches e mailas posibilidades da aplicación de realidade aumentada desenvolvida por Xoia Software, integrada cos ditos positivos.
Esta ferramenta de realidade aumentada, en palabras de Xoia, é unha especie de probador dixital adaptábel a calquera tipo de produto e sector e que permite visualizar un produto en tempo real e mesmo velo adaptado ao noso corpo ou desenvolvendo a función para a que foi concibido. Neste caso concreto de integración cos reloxos de Hustlers, a aplicación posibilita ver ao usuario, no seu propio pulso, os diferentes modelos da marca en tres dimensións. Desta maneira, o cliente pode velos e customizalos antes de mercalos. Amais, polo que se refire ao plano máis industrial, Xoia salienta as posibilidades actuais da ferramenta para permitir “unha máis rápida e eficiente comunicación entre os deseñadores do produto e as grandes marcas”.
Volvendo á feira de Nova York, a marca reloxeira galega empregará esta tecnoloxía para mostrar ao público as súas novas coleccións, así como as doutras marcas que comezaron a desenvolver en colaboración con dúas grandes compañías de moda americanas.
Como dixemos, Nova York non será o único lugar onde as dúas empresas galegas se presenten a nivel internacional. A pasada semana a aplicación de realidade aumentada desenvolvida por Xoia foi dada a coñecer por primeira vez no mercado chinés, coa participación dos impulsores de Hustlers Watches na HKTDC Watch & Clock, a feira de reloxaría máis importante de Asia e, xunto coa de Las Vegas e a de Basilea, unha das principais a nivel mundial. En palabras das dúas firmas galegas, a acollida da ferramenta no mercado chinés resultou ser “un éxito de precedentes” e unha experiencia “excelente”, amais “dunha nova mostra do enorme potencial da innovación tecnolóxica e a moda galegas”.