As tabletas Galaxy Tab S9 incorporan procesadores Qualcomm Snapdragon 8 Gen 2 e resistencia á auga

mércores, 26 de xullo do 2023 Marcus Fernández

Entre a gama de produtos que Samsung renovou hoxe está a familia de tabletas Galaxy Tab S, composta polas Samsung Galaxy Tab S9, S9+ e S9 Ultra, que contan con pantallas Dynamic AMOLED 2X, un potente procesador Qualcomm Snapdragon 8 Gen 2 e, como novidade, certificación IP68 para a tableta e incluso para o S Pen.
Estas tabletas permiten ao usuario escoller entre un amplo abano de tamaños de pantalla (11, 12,4 e 14,6 polgadas cunha relación de aspecto 16:10), deixando claro que son dispositivos enfocados á produtividade (de aí a súa xenerosa pantalla). Tamén coidan as súas cámaras con 2 cámaras frontais grande angular e ultra grande angular de 12 Mpíxeles e 2 cámaras traseiras grande angular e ultra grande angular de 13 e 8 Mpíxeles; e so seus 4 altofalantes AKG tamén garante unha experiencia sonora excelente.
Aínda que as tabletas poden adquirirse con até 1 TB de almacenamento interno, tamén permiten o uso de tarxetas microSD para ampliar a capacidade.
A nivel de software destaca por ser capaz de amosar até 3 aplicacións á vez mediante a tecnoloxía multifiestra, pero lembremos que estes equipos tamén contan con modo DeX, que simulan a experiencia dun ordenador persoal.
Estas tabletas están xa dispoñibles parra a súa reserva, aínda que o lanzamento oficial está fixado no 11 de agosto, partindo dun prezo de 899 euros para o Galaxy Tab S9 con conectividade Wi-Fi, 8 GB de RAM e 128 GB de almacenamento e chegando até os 1.909 euros do modelo con 16 GB de RAM e 1 TB de almacenamento interno, o que dá a entender que estes produtos buscan facer as funcións dunha tableta e dun ordenador.

PUBLICIDADE