Até 60 empresas e entidades participaron na xornada sobre TIC, emprego e loxística da UDC
martes, 25 de abril do 2017
Finalmente
celebrouse hoxe no paraninfo da Reitoría da UDC a
xornada sobre TIC, loxística e emprego que anunciabamos dende Código
Cero facendo referencia ao seu potencial como fonte de
información para afondarmos (a través de dous informes presentados
no seu transcurso) nas posibilidades de xerar postos de traballo na
Coruña a través da devandita confluencia entre novas tecnoloxías e
sistemas e iniciativas nos que se coordinen recursos humanos e
técnicos. A
cita foi inaugurada polo reitor, Julio Abalde, e o alcalde da Coruña,
Xulio Ferreiro. Na xornada participaron representantes dunhas 60
empresas e entidades que desenvolven políticas de emprego na cidade
galega e na súa contorna, entre eles o presidente da consultaría e
servizos TIC Altia, Tino Fernández.
Na
súa intervención, Abalde explicou a función do Observatorio
Ocupacional da UDC, que dirixe a profesora da área de Fundamentos da
Análise Económica, María Jesús Freire Seoane. Este cometido,
sinalou, non é outro que exercer de recurso continuo e exhaustivo de
seguimento acerca da inserción laboral dos titulados, un ámbito, o
da inserción, no que a “UDC segue a destacar nas diferentes
clasificacións de empregabilidade así como de emprendemento”,
engadiu o reitor.
Abalde
tamén salientou as oportunidades de acción que se abren cos dous
informes presentados na sesión (Prospección de sectores
xeradores de emprego na área metropolitana da Coruña: TIC e
Loxística realizado polo Observatorio Ocupacional da UDC, e
máis o Estudo sobre a situación da igualdade entre mulleres e
homes no hipersector TIC, realizado pola Fundación Mulleres)
non só “polos datos obxectivos que poden achegar”, senón porque
“encadran perfectamente dentro das áreas de especialización coas
que pretende dotarse o Campus da Coruña”. Estas áreas de
especialización son, como lembraremos, o
Campus Innova, relacionado co sector novas Tecnoloxías da
Información e a Comunicación (TIC), e o Campus da
Sustentabilidade, vencellado á Responsabilidade Social, entre outros
recursos. Abalde felicitou ao Concello da Coruña pola xornada e por
promover estes dous estudos.
Pola súa banda, o alcalde
resaltou que estes informes “servirán para poñer en marcha
mecanismos que incidirán na creación de emprego e na busca de
oportunidades para aqueles colectivos con maiores dificultades á
hora de acceder ao mercado laboral”. Ferreiro lembrou que “a
prosperidade das nacións créase, non se herda, e depende da
capacidade dos sectores de actividade para innovar e progresar”.
Traballos coma estes, sinalou o rexedor, “son a vía para conseguir
camiñar cara a unha cidade máis igualitaria, máis innovadora e
máis responsábel”.