Balidea achega a aplicación móbil da Festa da Istoria de Ribadavia
luns, 22 de agosto do 2016
A Festa
da Istoria de Ribadavia, para moitas e moitos a máis referencial das
nosas celebracións medievais, xa ten aplicación móbil de seu.
A encargada do seu desenvolvemento foi a firma compostelá Balidea,
especializada no desenvolvemento e integración de recursos software,
consultoría de sistemas de información e servizos dixitais. A
aplicación, que é de balde, está xa dispoñíbel para trebellos
iOS e para dispositivos
con sistema operativo Android. Segundo informa a Fundación Festa
da Istoria, na ferramenta móbil poderemos atopar toda a información
relativa á cita do 26 e o 27 de agosto: o programa, liñas de
autobús, aparcadoiros, centros sanitarios, emerxencias, postos de
comida, artesáns, oficinas de troco de marabedís, etc.
Ademais, grazas á
aplicación, os veciños e visitantes irán recibindo nos seus
aparellos móbiles todas as novidades relativas ao programa e á
propia preparación da festa ao longo do ano.
Por outra banda, informar
tamén de que a vertente tecnolóxico-dixital da Festa da Istoria
reforzouse este ano (amais de co lanzamento da app), coa
dispoñibilidade dunha serie de puntos de acceso Wi-Fi para podermos
consultar os contidos actualizados da devandita ferramenta deseñada
por Balidea. Estes son os puntos de conexión achegados polos
establecementos e veciños da vila:
-Café-Bar Morto-Rúa
Progreso
-Bar Meu-Rúa Progreso
-Cafetería Dessert-Alameda
-Ribeiro e Xamón-Praza Maior
-Vinoteca-Praza
Maior
-Restaurante Praza-Praza Maior
-Café-Pub Aljama-Rúa
Trasmesones
-Cafetería Rectoral-Praza Maior
-Sede
Coordinadora Festa da Istoria-Rúa Escobetes
-Concello Banco
Alhóndiga-Praza Maior
-Autoescola Yoli-Praza San Martín
-Casa
Lhou-Rúa Yañez
Por certo que a rede Wi-Fi chámase “ISTORIA
2016”.