Balidea achegará as posibilidades de ADESTRapp aos clubs galegos de fútbol
venres, 27 de setembro do 2019
A
empresa
TIC Balidea, con sede principal en Santiago, vén asinar un convenio
coa Real Federación Galega de Fútbol para facilitar o uso da
ferramenta ADESTRapp entre os clubs galegos: será o recurso de
video-análise de referencia para todas as seleccións galegas de
fútbol, fútbol sala e árbitros. O convenio asinado entre ADESTRapp
e a Federación inclúe tamén a inclusión nos cursos formativos de
adestradores de material didáctico relacionado con esta ferramenta,
“para que o alumnado poida profundar nas vantaxes competitivas da
análise en tempo real”, sinalaron durante a formalización do
acordo, rubricado este martes.
A
maiores, a alianza tamén inclúe o fornecemento de vantaxes aos
clubs de Galicia que aposten pola introdución das novas Tecnoloxías
da Información e a Comunicación (TIC) no seu traballo. Así, os 15
primeiros pedidos que se realicen por medio da Real Federación
Galega de Fútbol terán un desconto de 20% sobre o prezo, que será
do 10% a partir do pedido número 16.
A
sede da RFGF en Santiago de Compostela acolleu este martes 24 de
serembro a sinatura deste convenio. No acto participaron Lorenzo
Rodríguez, director xeral de Balidea; Pablo López, responsábel do
proxecto; Iván Cancela, presidente do Comité Galego de Adestradores
e director da Escola Galega de Adestradores; e Rafael Louzán,
presidente da Real Federación Galega de Fútbol.
A
Real Federación Galega de Fútbol agrupa a 1.863 clubs de fútbol,
fútbol sala e fútbol gaélico de Galicia. Segundo informou Balidea,
“a versatilidade de ADESTRapp como ferramenta de captación,
transmisión e análise de vídeo aplicado a contornas de alta
competición e adestramento convértea nun produto atractivo para
equipos de todas as categorías”. No máximo nivel foi empregado
con éxito por clubs como o Atlético de Madrid, o Deportivo da
Coruña, o Betis, o Leganés, o Málaga, o Al Nasr Club de Dubai e
Xangai Shenhua. Tamén se está empregando por equipos doutras
disciplinas, como o Obradoiro CAB de baloncesto ou o Judo Club
Coruña.
