Balidea achegará solucións de seguridade de aplicacións da prestixiosa compañía Checkmarx
xoves, 31 de xaneiro do 2019
Balidea,
compañía galega especializada en desenvolvemento de software e
ciberseguridade, vén de selar unha alianza coa empresa israelí
Checkmarx, para a venda de
solucións de protección tecnolóxica destinadas á análise da
exposición de aplicacións e servizos TIC. Segundo informa Balidea,
a distribución das ditas solucións levarase a cabo na área
xeográfica de influencia da empresa da nosa terra: o mercado español
e outros mercados europeos.
“Trátase
dun acordo estratéxico para nós que pon en valor a nosa aposta
recente pola ciberseguridade aplicada ao desenvolvemento de
solucións, que é a cerna do noso negocio”, sinalan dende Balidea,
engadindo que Checkmarx é “unha das compañías mellor emprazadas
no seu ámbito”.
Amais,
a empresa israelí é valorada no cuadrante máxico de Gartner como
“a mellor solución do mercado de probas de seguridade de
aplicacións e servizos, que permiten aos equipos desenvolvedores
entregar software seguro máis rápido”.
A
maiores, Checkmarx conta con máis de 2.000 clientes de dimensión
empresarial a nivel mundial, incluíndo as principais empresas
tecnolóxicas (por exemplo SAP, Samsung e Salesforce) así como
grandes entidades do sector bancario e numerosas organizacións
gobernamentais e institucións públicas.
Na
súa valoración do acordo asinado, Balidea engade que no catálogo
de Checkmarx salienta unha plataforma de probas de seguridade para
contornas áxiles de desenvolvemento de software, como DevOps e CI,
baseados no despregue continuo. Esta tecnoloxía, entre outras
cousas, permite que os desenvolvedores proben a fondo o seu propio
código para problemas de seguridade, posibilitando obter resultados
instantáneos e remediar as incidencias ao momento.