Balidea fortalece a súa vertente colaboradora en proxectos de I+D+i
martes, 19 de xuño do 2018
A
empresa galega Balidea,
centrada dende hai máis de quince anos no fornecemento de servizos
TI (software, consultoría, desenvolvemento, I+D+i), é unha empresa
nova con proxección de futuro. Isto que significa para a propia
compañía? Pois segundo nos conta Óscar Vázquez, director técnico
de Balidea e responsábel de Prevenda Técnica, a proxección de
futuro convértese nun acicate para os novos profesionais, “que vén
en nós a posibilidade de medrar nunha empresa que aborda retos
tecnolóxicos”. Vázquez tamén nos leva da man aos proxectos
actuais da firma e ás posibilidades importantes que se abren da
colaboración con outras empresas.
-En
que proxectos está a traballar Balidea na actualidade?
-Estamos
a traballar en proxectos de distinta natureza tanto en
administracións públicas coma entidades privadas; a nivel
internacional podería destacar os servizos que estamos a prestar ao
Concello de Dinamarca, cliente co que iniciamos unha alianza
tecnolóxica en 2017 e co que estamos a colaborar nos seus
procedementos de transformación dixital a nivel interno (intranet,
portal do empregado…) e externo (proxectos web). Outro proxecto
interesante iniciado a finais de 2017 en colaboración coa entidade
Global Covenant of Mayors for Climate & Energy é o proxecto
OpenCidi que ten por obxectivo prover información enerxética e
climatolóxica sobre todas as cidades a nivel mundial. A nivel
nacional, nas vindeiras semanas verá a luz o novo portal web
institucional de Les Corts Valencianes. Así mesmo, non quero deixar
de nomear o proxecto para a Axencia de Modernización Tecnolóxica de
Galicia (AMTEGA) do sistema de información para os servizos de
transporte público regular de Galicia.
-É
o desenvolvemento de proxectos en colaboración con outras empresas
unha oportunidade en si mesma?
-En
Balidea estamos convencidos das grandes oportunidades que nos
proporciona a colaboración entre empresas, temos unha gran
experiencia na execución de proxectos en colaboración con distintas
entidades. Dende a Oficina Técnica encargámonos de detectar as
necesidades dos clientes, que derivan en oportunidades de negocio.
Unha vez localizadas, buscamos a maneira de executalas internamente
e, de non ser posible, botamos man da colaboración con outras
empresas. Isto adoita darse principalmente en proxectos de I+D+i e
resúltanos sempre unha experiencia enriquecedora.
-Cales
son as fortalezas do departamento de Prevenda Técnica?
-Sen
dúbida, o valor humano. O coñecemento e a experiencia da xente que
conforma o equipo de Balidea. Levamos 15 anos preparando propostas e
presentando ofertas. A empresa acumula unha experiencia que lle ten
valido para configurar e organizar un equipo de traballo
multidisciplinar integrado por profesionais experimentados, altamente
cualificados e en continuo proceso de aprendizaxe. Por dar un dato,
no ámbito público, presentamos unha media de 100 proxectos ao ano,
cunha porcentaxe de casos de éxito dun 25%. E todo isto é unha
realidade grazas á especialización técnica do equipo, un conxunto
de profesionais que ofrece os seus coñecementos de maneira
transversal á organización.
-Que
diferencia a Balidea da súa competencia?
-A
nosa principal responsabilidade é un dos eixes da nosa
sustentabilidade é ofrecer aos nosos clientes solucións e servizos
innovadores e cuns altos estándares de calidade. Como tal, aválannos
as normas UNE-EN ISO 9001:2008, UNE- ISO/IEC 27001:2007, UNE-ISO/IEC
20000-1:2007, UNE 166002:2006, e UNE-EN ISO 14001:2004 coas que conta
a empresa. Ademais, Balidea ten implantado o modelo de calidade no
desenvolvemento de software CMMI (Capability Maturity Model
Integration). Doutra banda, en termos funcionais e técnicos, e
malia que contamos con 200 profesionais, polo que non somos unha
empresa pequena, a nosa fortaleza é a axilidade á hora de executar
proxectos. Gardamos un alto compromiso co noso traballo, reflectido
na satisfacción do cliente. É dicir, executamos un proxecto e polo
xeral continuamos traballando con el, feito que nos agrada
enormemente.
-E
doutra banda, para reter o talento, que medidas adopta a empresa?
-Balidea
é unha empresa nova, en continuo crecemento e cunha alta proxección
de futuro. Isto convértese nun acicate para os novos profesionais
que ven en nós a posibilidade de medrar nunha empresa que aborda
proxectos novos, e que se presentan como retos tecnolóxicos. As
colaboracións que mantemos e as alianzas con empresas e entidades de
calado coas que contamos supoñen, tamén, outro aliciente.