Balidea mostra en Polonia as vertentes da súa aposta polo cliente

Balidea segue a estender o seu radio de acción en Europa: amais da súa intensa actividade en Dinamarca e Reino Unido, está a afianzar presenza en países como Polonia, onde vén de participar no evento Best Outsourcing Pratices Meetup, organizado en Gliwice pola empresa local XSolve para compartir a súa experiencia e coñecemento na prestación de servizos tecnolóxicos a nivel internacional. O encontro tivo lugar o pasado xoves 22 de febreiro e nel estiveron presentes outras empresas tecnolóxicas de Holanda, Dinamarca, Italia, Alemaña, Sudáfrica e Cataluña.
Por Balidea interveu Iago Fernández Bugallo, director de proxectos internacionais da empresa de Santiago, que salientou a importancia de achegar un valor engadido ao cliente. “Balidea non só presta servizos, senón tamén talento. Os nosos profesionais son capaces de entender ao cliente máis aló das súas necesidades concretas de software, axudándolle a mellorar o seu negocio”, engadiu.
Segundo informa a compañía TIC galega, a devandita foi a segunda xuntanza desta índole organizada por XSolve, que decidiu contactar con Balidea “pola súa grande experiencia na externalización de servizos tecnolóxicos a nivel internacional”. Para Balidea foi “unha oportunidade para coñecer como empresas do sector prestan servizos semellantes, poñer en común boas prácticas e identificar cales son as principais liñas de traballo no ámbito do outsourcing tecnolóxico”.